Shillong: Mynta ka sngi ki Tourism Societies hapoh ka Darrang Elaka ba kynthup ia ka Darrang Tourism Promotion and Development Society, ka Shnongpdeng Tourism Development Society bad ka Dawki Tourism Development Society, ryngkat u Dalloi bad ki nongialam ka Elaka, ki la iakynduh ia u Bah Prestone Tynsong, synbud myntri ka sorkar Meghalaya, halor ka jingeh kaba ki la mad na ka jingsaw bad jingjngut ka um ha wah Umngot.
Ha kane ka jingiakynduh, ki la pynsngew ia ka jingeh halor kane ka bynta namar kum ha kane ka por tlang ba rkhiang ka suid bneng, ym ju don ka jingjngut ka wah Umngot, hynrei dei tang ha une u snem ba mynta ka long kumne kaba la wanrah ia shibun ka jingduhnong ia ki Nongtrei kam jngohkai kiba im kamai jakpoh na kane ka wah.
Ka daw kaba la pynlong ia kane ka jingjngut ka wah, ka dei kaba la wan na ka jingtrei surok Shillong Dawki ha ki thain sharum Laitlyngkot kaba ioh lehse don ka jingtheh khyndew ha ki ki wah kiba la poi shaduh Dawki.
Kine ki Nongtrei kam jngohkai ki pynpaw ba kim pyrshah ia ka roi ka par ban shna surok bad ki pynpaw ba ki da sngewbha eh ban iatreilang bad ka bor sorkar haba don kino kino ki jingeh ban thaw lad ban pynbeit bad halor kane ka mat ki la kyrpad ia ka sorkar ban pynbeit noh kloi namar ka aiom wan kai ka la poi.
Ki trai shnong ha kane ka thain ki ioh ioh kam na kane ka jingwan ka kam jngohkai da kaba ialam kai shonglieng ia ki tourists, kaba buh ingbasa, kiba shong dukan bad don ruh kiba shim da ki ram na bank ban sengkam lajong, hynrei mynta ki la hap ban mad jingeh bad ka kamai kajih jong ki ruh ka la hiar arsut.
Ki la pynpaw ka jingkmen namar u bah Prestone u la shim khia mardor ban thaw lad ban pynbeit ia kane ka jingeh.
Ha kane ka jingleit kynduh la synran lang ruh da u bah Stephanson Mukhim, MLA barim ka 7 Amlarem.
Kylla pung ktieh ka wah Umngot, duh kam khait ki trai na ka kam jngohkai
