Shillong: Ka IndiGo, ka Airline kaba heh tam ha ri India ha ryngkat bad ka Don Bosco Youth Centre ka la pynlong da Campus Recruitment Drive (Walk-in Interview) na ka bynta ka jingjied ïa ki Cabin Crew, lyngba ka jingïatreilang bad ka Emporium Skills Training Institute (ESTI), ha ka Training Centre jong ka kaba don ha Don Bosco Youth Centre (DBYC), Laitumkhrah, Shillong.
Ha kane ka jingjied ia ki nongtrei ka Cabin Crew, kumba 700 ngut ki kyrtong na kylleng ka thain North East India ki la thep ia ka kyrteng jongki ha ka online registration, bad na kine, 242 ngut ki la wan shim bynta ha ka interview. Hadien ka jingbishar bniah, saw ngut ki kyrtong ki la shah jied ban rung ha kane ka kam.
Kane ka lad plie kam ka dei ka sien kaba nyngkong eh ba ka Don Bosco Youth Centre, Shillong —ka shlem ai jinghikai ba paw ha jylla ba ka la ioh ban pynlong ia kane ka Walk-in Interview da ka jingïatreilang jong ka Airline ba khraw tam ha ka ri. Ka Centre ka la bteng ruh ban trei na ka bynta ka jingkyntiew ïa ki samla lyngba ka jingsam sewing machine ban ai lad ïa ki ban sengkam la jong.
Ha u bnai Nailur 2025, ka ESTI bad ka Don Bosco Youth Centre, Shillong ki la soi ïa ka Memorandum of Understanding (MoU) ban ïatreilang ban ai jinghikai bad ban plie lad ban pyioh jingtrei kam ha ka Aviation, Hospitality bad Luxury International Cruise Lines. Kane ka jingïatreilang ka dei ka thong ban kyntiew ïa ki samla bym ioh kam ban rung sha ki kam kiba bapher bapher.
Kane ka Cabin Crew Recruitment Drive ka dei ka sien kaba nyngkong hadien ka jingsoi ïa ka MoU, bad la khmih lynti ba kin don shuh-shuh ki lad jingpynrung kam na ki company na India bad ruh na kiwei ki ri bapher bapher ha ki bnai ban wan. Ka ESTI kan nang bteng ban ai jinghikai bad jingpynkhreh ïa ki samla ha Don Bosco Youth Centre, Shillong, ban pynkhreh ïa ki na ka bynta ka kam trei ha palat 20 tylli ki ri ha kylleng ka pyrthei.
Haba kren sha ki nongthoh khubor, u Fr. Michael Makri, SDB, Director ka Don Bosco Youth Centre, Shillong, u la pynpaw ka jingsngewkmen bad ka jingangnud shuh jong u ban iarap ïa ki samla:
“Ka long kaba sngewsih ban tip ba kumba 700 ngut ki kyrtong ki la pynrung kyrteng hynrei tang saw ngut ki la shah jied. Bun na ki samla, khamtam na Meghalaya, kim dap ïa ka jingrynieng kaba donkam, katba kiwei pat ki shem jingeh ha ka koit ka khiah bad ka jingïa kren — khamtam ha ka ktien Hindi. Nga kyntu ïa kiba ymshem la shah jied ha kane ka sien ba kin wan ban pynkhreh bha ïa lade ha Don Bosco Youth Centre ban long kiba biang na ka bynta ka sien kaba bud.”
U Fr. Makri u la ai ruh ka jingsngewnguh kaba kyrpang ïa ka IndiGo Airlines bad ka Emporium Skills Training Institute (ESTI) halor ka jingïatreilang bad ka jingkyrshan jong ki ban pynioh kam ïa ki samla ka Meghalaya bad ka North East hi baroh kawei.
Pyllong ka Indigo ia ka Campus Recruitment Drive ia ki cabin crew
