Shillong: Ka Khasi Hills Autonomous District Council (KHADC) ka la kren da kaba shai ba kam don pisa ban maramot ïa ka surok Wahkaji sha Nongtnger, bad pynpaw ba ka kloi ban ai ïa ka NOC sha kino kino ki kynhun ba kloi ban pynmaramot lem.
Kane ka la paw hapoh ka īingdorbar haba u MDC ka UDP na Langrin, u Bah Pius Marweiñ u la buh jingkylli, la ka KHADC ka don jingthmu ne em ban aiti noh ha ka tnat PWD ban maramot ïa katei ka surok na Wahkaji sha Nongtngersha.
Haba wanrah ïa ka jingkylli, u Bah Pius u la ong ba ha shilynter katei ka surok ki don haduh 11 tylli ki shnong, bad katei ka surok la pyntrei da ka KHADC naduh ki por ba mynshwa, ïa kaba ym shym la maramot shuh haduh mynta.
U la kyrpad ïa u EM ba lada ka Council kan aiti noh sha ka PWD kaba dei ka jingkwah jong ki shnong, yn pynrung noh ïa ka ha ka skhim PMGSY IV kumba ïoh lem kiwei ki shnong, namar kumba ka long mynta ka KHADC ban maramot hi ruh ka em, ha kaba u la bynrap ba lada ym lah ban aiti sha ka PWD ka EC ka dei ban leit peit lem ïa ki paidbah jong kitei ki shnong kiba hap ïaid da ki phew kilometre ban leit sha ki jaka sumar bad ban leit ïew.
U Bah Pius u la ong ruh ba ym dei ban pynkylla sohpdung ïa ki paidbah tang namar ba don u Uranium ha katei ka thaiñ.
Ym don pisa ka KHADC ban maramot ia ka surok Wahkaji-Nongtynger, aiti noh ha PWD, ong u MDC
