Shillong: Ka jingjia ba sngewsih ia u samla Ricky Thangkhiew, 21 snem ka la pynshaiong ia ki paralok jongu baroh kiba la leit lang namar katba ki dang ia muja ban pdem um ialade na ka jingmih syep mih syar ba la iaid 2 kynta eiei, ula kynduh pynban ia kane ka apot.
Kane ka la jia ha ka 23 tarik Risaw 2025 ha ka pung lynngam ka wahrew.
Ha ka jinghiar ki nonglum khubor sha katei ka jaka, la iohi ba ka pung ka long kaba jylliew bha bad ka um ka dang heh bha namar ba ka dang shu kut ka aiom slap.
Ki ia leit para klas ar bos na Shillong ban leit bam sngewbha sha katei ka jaka, kaba khot ka pung Lyngngam kaba hap iaid na shnong Sohkhmi bad shwa ban ia bam ja, ki mareh shwa wut wut ban pyndei um ia ka met ka phad na ka jingshit bad phuh syep. Katkum ka jingtip, kila ia poi kumba ha ka por 2 baje eiei mynsngi hynrei kane ka jingjia ka la wanrah pynban ia ka jingsngewsih.
U samla Ricky u dang pule 3rd Semestar ha Synod College, Shillong bad u sah ha Nongkseh, Laimer Upper Shillong.
Ki pulit ka Search and Rescue Team ryngkat ki pulit ka Sohra ha ka sngi ba jia, kila hiar bran bran sha katei ka jaka hynrei namar ba la miet, kim lap satia ia ka met jongu bad dei ha ka sngi babud kata ha ka 24 tarik Risaw 2025, ba kila ioh ban sei ia ka met jong u na pung Liewla kaba jngai kumba 200 metre na ka jaka kaba u shah rah ha ka um.
Ban poi sha shnong Sohkhmi hap iaid na Kutmadan, Sohra kumba 40 minit bad na shnong sha wahrew kan shim por jan 1 kynta tam ban kiew ia u thiep bad ka pynnoh.
Uwei na ki paralok u la ong ba u la pyrshang ban ïarap, hynrei ha katei ka por ka um ka heh bha ka lat lat bad ka khlaiñ bor bha bad ka la rah ïa u sha kawei ka liang bad ïa u paralok jong u sha kawei ka liang.
U la ïathuh ba kitei ki paralok ki la pyrshang katba lah ban ïarap ïa la ujong u paralok bad la ïoh ban bat ïa u samla ricky, hynrei namar ba khlaiñ palat ka um ka la tan bak bad khlem ïohi shuh.
Ia katei ka jaka la ju peit lang ki lai shnong ba kynthup ia ka Sohkhmi, Mawlatang bad Mawkliaw.
Mar ia poi ki leit pdem um ba la iaid 2 kynta eiei, shah rong pynban ha ka um
