Shillong: Ka surok na Mawsynram shaduh Balat, Umpung ka dang sah naduh hyndai kumba dang iaid ka bos MTC tang ar sien ha ka sngi, kata mynstep bad janmiet.
Mynta u snem lei, donbok bym jur u slap kumba ju long ha kiwei ki snem, hynrei kane ka surok kaba jot raitoi, ka lah ban jah syndon lada jur u slap.
Ka jinglong jingman kane ka surok, ka pyni ia ka jingbym kitkhia ka sorkar ha ki phew snem bad haduh mynta katba ki paidbah pat ki nang syllang bad ka la mih ka jingkylli shaei bad kumno ka jylla kan kiew haba ka surok kaba dei ka thied snam, ka long lyngkrang lyngkrong.
Mynta ka sngi, ka Synjuk ki Rangbah Shnong Mawsynram ryngkat bad u MLA u MDC ki la kynduh ia u Symbud Myntri Rangbah ka jylla Bah Prestone Tynsong ban pynheh bad pynbha ia kane ka surok naduh Weiloi shaduh Balat, Umpung.
U Chairman ka Synjuk u bah Hiamdor Rapsang ula pynpaw ia ka jingsngew khia jur halor ka jingieh khunswet ka sorkar ia kane ka surok haduh mynta ki sngi, bad ha kine ki sngi, la don sa ki sengbhalang kiba la pynbna ban khang iaid kali noh namar ba kan long ka jingma ia ki paidbah.
U la ong ba kane ka surok ka long kum ka patlun jot ha kaba la shu syrdep man ka por bad ka la donkam ban phong patlun thymmai.
Katkum ka jingiathuh u bah Hiamdor, u Symbud myntri rangbah ula pyntip ba ka sorkar ka la pynkhreh ban pynheh ia kane ka surok na Weiloi sha Phlangwanbroi na ka pisa ka World Bank ban sdang lashem snem katba na Phlangwanbroi sha Balat-Umpung, la pynkhreh ha ka jingmang T.280 klur.
Ka surok sha Mawsynram, Balat dang neh kum hyndai, iaid tang kawei ka bos MTC
