Shillong: Ka Lapangap ka la paw bha ha kine ki sngi, namar ka jingmih ka jingiakynad hapdeng ki ar kynhun kiba sah ha Meghalaya bad kiba sah sha Assam namar ba ka dei ka jaka khappud hapdeng kine ki ar tylli ki jylla.
Ka Lapangap ka don kumba 100 km eiei na nongbah Shillong ban iaid na Ummulong sha Wahiajar ter ter shaduh ban poi ha Lapangap.
Ki don kumba 300 tam eiei ki tnum ïing ha ka shnong Lapangap hapoh ka Wahiajer konstitwensi kaba mihkhmat da u symbud myntri rangbah bah Sniawbhalang Dhar, ka West Jaintia Hills hapoh ka Thadlaskein Block.
Ki briew ki im da ka rep ka riang bad u mar rep ba kongsan duh u dei u kba. Ki don ruh kiba ri jingri khamtam ka ri masi ha katei ka shnong bad ki thung kiwei kiwei ki mar rep ruh kum shynrai, sying, bad kiwei. Ka pynthor kba ka dei kaba tang maka, kaba ai jingim ia ki phew pateng ia ki nongshong shnong kane ka shnong.
Ka surok ban poi sha Lapangap ka kham kynjah naduh Namdong bad ka surok ka bun ki khongdong.
Ha kine ki sngi, ka Lapangap kala paw namar ka la don ka jingiakynad bad ki briew kiba sah na Assam na shnong Tapat halor ka pynthor kba ha kaba ka la don ka jingkhang lad ia ki briew ka Lapangap ban leit ot ia u kba.
Ka jingiakaji ka la bthei hadien ba ki Khasi na Lapangap kila shah khang ban leit ot ia u kba ha ki briew na ka shnong Tapat, ka Assam kaba don ha syndah ha katei ka jaka, haduh ki bor sorkar na baroh ar liang, kata ka Meghalaya bad ka Assam kila hap ban tuklar ban pynbeit ia kane ka jingiatyngkhuh.
Dei halor kane ka nongrim ba la shah ia ki Khasi ban leit ot ia u kba ha ka jingpahara ki pulit.
Watla kine ki ar tylli ki shnong kata ka Lapangap bad ka Tapat kila iasoi ia ka jingiateh ban pynneh ia ka shongsuk shongsain hynrei ka don ka kyndon ba la buh ba lada ki pulit kim kem halor ka jingshah pyniap uwei u briew na Tapat, ka jinglong jingman kan ym long kaba suk kaba sain ha ka aiom ot kaban sa wan.
Kumba ka paw, ka thain Lapangap ka dei kaba seisoh ha ka rep ka riang hynrei ki briew ki dang duna ha ka jingthaw lad ban rep ha ka rukom kaba heh bad kaba ai jingmyntoi shibun bad ka la donkam ia ka sorkar ba kan shim ia kane, khnang ba ki briew kin riew spah na ka kam rep kam riang bad kumjuh na ka kam ri jingri.
Shi sngi ha Lapangap, ka pynthor kba tang ma ka, ka pliang ja ia ki phew pateng
