Shillong: Ka jingrakhe lehkmen Diwali jong ki riew ngeit Hindu, ka la wanrah ruh ka jingkmen ia ki paidbah ka nongbah Shillong.
Mar syn kem dum bad sdang iongrein ka miet, la ioh sngew ia ka sur kaba sawa kynthlum kynthlam kaba jam na ka jingbhtei ki bomb pataka jong ka tamasa Diwali ha kylleng ka nongbah Shillong bad ka tdem kaba la lynguh na ka jingbthei ki bomb pataka.
Ka Diwali ka dei ka jinglehkmen ki Hindu da ki ding jingshai kylleng ka ri. Ka dei ka dak jong ka jingjop ka Dharma ne ka hok ia ka Adharma ne ka pop, ka jingshai halor ka jingdum, ka jingbha halor ka jingsniew bad ka jingtip halor ka jingsahdum.
Ka bor district ka la ai jingbit ban thang pynbthei ia kine ki bomb pataka hapoh 10 baje mynmiet khnang ba kan ym pynthut pat ia ki paidbah hadien kane ka por.
La iohi ba ki riew ngeit Hindu kila rakhe ia kane ka Diwali da kaba pynieng ia ki pashor kait ha khmat ki dukan, ki ïing sah, ryngkat ki ding ban pynthaba bad ai jingshai, kum ka jingkmen ba ka jingshisha ka jop ia kaba sniew.
Hynrei ka kham shongshit shuh haba wat kiwei ki bym dei na ka jingngeit Hindu ruh, kila iashim bynta shitrhem ban thang bomb pataka, haduh ba ka sor Shillong ka la sakhi ia ka jingbthei ki jingsaw khlem sangeh linter ha kane ka janmiet.
Ki shipai BSF ruh kila pyllong ia ka jingrakhe Diwali ha Mawpat, da kaba pyllong ia ka Diwali Mela bad la sakhi ia ka jingleit sakhi ki paidbah ha kane ka mela ba la pynkhreh da ki jingbam thiang ba lai phew jait katkum ka rukom jong ki Hindu.
Kynthlum kynthlam ka sahit bneng na ka jingsawa ki bom Diwali
