Babu Kular Khongjirem.
Ka sorkar MDA-I (2018-2023) bad sa ka sorkar MDA-II(2023–) ba la lamkhmat da ka party NPP hapoh ka jingialam U Conrad K Sangma ka la synshar kumba 7 snem shiteng tam ei ei ha kane ka jylla Meghalaya jongngi.Hapoh kine ki 7 snem shiteng tam ei ei, ka sorkar MDA 1&II ka la phiel (failed) ha kiba bun bah ki liang(failed in all fronts).Ngin shu ai nuksa tang 5 tylli ei ei ki mat ba kongsan(5 important issues) ba kane ka sorkar MDA I &II ka la phiel ban pynurlong ha ka jylla.
Kaba nyngkong eh ka dei ka jing phiel jongka party NPP ban bat bad pyntreikam ia ki kyntien kit jingmut ne ka motto jongka kaba la thoh shai kum”Ka Sur jong ka North East India” ne “The voice of the North East”.Hadien ba la kulmar bad shah leh bein ha ka synshar Khadar da ka sorkar NDA na Delhi ba la ialam da ka BJP kaba dei ruh ka paralok ba iajan eh ka NPP ha ka state Manipur, ka kyntien kit jingmut jong ka NPP ba ka dei kum ka “Voice of the North East” ka la kylla kamkai bad shah rkie bein ha ki para state jong ka North East jong ka ri India.Tang ban saham ruh kam nud satia ioh duh paralok ei bad ka BJP bad ioh ym don ba ai pisa shuh ia ki puk puk na Delhi.
Kaba ar pat ka dei ka kam ne issue Them motor kaba la pynlong ia ki paidbah ba bun ban ngiah bad kdang hi shoin ban sngap ne wat ban ia ialap hi ruh. Wei la mih ka khubor Them motor, ka sorkar MDA naduh ka snem 2018 ba la sdang akhih ka Sur u Paidbah ka la kular shi kular lai phew jait ban pynkynkynriah shi pynkynriah man ka por.Hynrei haduh mynta,kane ka kam ka la shu sah kut bad sdien ldui khlem poi sha bneng ne sha khyndew ruh.
Kaba lai bad ba saw pat ka dei ka kam(issue) jong ka ILP ha Meghalaya bad ka jingpynrung ia ka ktien Khasi ha ka kyrnit kaba phra(8th Schedule) ha ka riti synshar ka Ri India.Lah dep mynjur ne pass na ka Meghalaya Legislative Assembly mynta la bun snem mynta hynrei katei ka kam ruh ka la kylla kam kai pynban bad kalong ruh ka jingshah rkhie bein hakhmat ka pyrthei India ba iar.
Kaba khadduh bad kaba donkam bha ka dei ka kam khappud(border issue). Ki nongialam ka party NPP ki la ia kop sarong khyllew bha ba,hana,dei tang kane ka party bad ka sorkar MDA kaba nud bad shlur ban pynbeit ia ka kam khadpud bad ka Assam.Hynrei,katba ka nang kop katba ka nang jot bad nang sniew dur pynban.Shu buh teng shi buhteng katba ka Assam pat ka nangleh da ki kam napoh napoh.Imat,kine ki nongsynshar jongngi kilong tang kum i khnai ha khmat u Hati Himanta Biswas Sharma. Wat haduh ban da iap briew ruh, imat katei ka kam kan nym poi satia shano shano ruh.
Kine kilong tang khyndiat eh ki kam bah(burning issues) kiba kane ka sorkar MDA ha Meghalaya ka la phiel(failed) kum ka sorkar jylla.Yn nai iakren ia kiwei kiwei ki kam kum ka thoh ka pule puthi(education),ki kam pynbha surok( roads), ka scheme umbam umdih ha man la ki thliew iing briew, ka smart city ha Shillong, ka koit ka khiah(health) nalor bun bah kiba ki paidbah ki dei ban ia bishar lang nangne shakhmat.
5 Tylli ki mat ba kongsan ba ka sorkar MDA-I & II ha Meghalaya ka la Phiel
