Shillong: U CEM ka KHADC u bah Winston Tony Lyngdoh ula pynshai ba ka jingshim khajna na ki nongtrei, ki nongsengkam kum ki dukan ka dei kaba leh naduh mynshwa bad kam dei kaba dang shu leh ka Executive Committee kaba mynta.
Haba kren sha ki lad pathai khubor mynta ka sngi, u CEM ula ong ba kane ka khajna ka long kaba donkam ban pynmih pisa ia ka Council ban pyllut ha ki jingdonkam jongka khamtam haba ka shah khnoit ha ka sorkar jylla ha kiba bun liang.
Hynrei ha kajuh ka por, u la ong ba ka jingleit sam shithi ki briew na KHADC sha ki dukan kylleng dang shen, ka dei kaba shu leh khlem ka jingai bor na ka Executive Committee. U la ong ba ka jingleit sam ka long kaba bym dei namar ba la shu sam pathar khlem da pynshong dor shwa ia kano kano ka kam bad na ka liang ka EC kan sa pynbeit shwa ia kane bad ka la phah pynsangeh mardor ia ka jingleit sam shithi.
U CEM ula ong ba la pan jingjubab na u ophisar ba leh ia kane ban phah leit sam ia ka shithi namar ba la leh ha ka por ba ka Council ka dang bunkam bha ban iapyrkhat na ka jingiehnoh kam u CEM barim bah Shemborlang Rynjah. U CEM u la ong ba lada lap ia ka jingshisha, lah wat ban suspen ia u ophisar.
Ha kajuh ka por, u CEM ula pynshai ba ka jingshim khajna ka don la kajong ka kyrdan katkum ka jingkamai jong ki briew ha kaba kiba kamai 50 hajar shi snem sharum kim donkam siew khajna katba kiba kamai 50-75 hajar ki hap siew T. 200, kiba kamai 75-1 lak kin siew 300 tyngka, 1 lak-1.50 lak kin siew 500 tyngka, 1.50 -2 lak kin hap siew 700 tyngka, 2 – 2.50 lak kin hap siew 1 hajar tyngka, 2.50-3 lak kin hap siew 1300 tyngka, 3-3.50 lak kin hap 1500 tyngka, 3.50 haduh 4 lak kin siew 1600 tyngka, 4 lak haduh 4.50 lak kin siew 2100 tyngka, 4.50 haduh 5 lak kin siew 2000 tyngka bad kiba kamai 5 lak shaneng kin siew 2500 tyngka shi snem.
Ka jingshim khajna ka la dei kaba naduh mynshwa, ka jingleit sam shithi khlem tip eiei ka EC: CEM
