Shillong: U myntri rangbah ka jylla u Conrad K Sangma ula hukum ia ki pulit ba kim dei ban map ia ki nongkhaïi drok bad ki dei ban ai da kaba tyngeh beit katkum ka ain.
La hukum ban pyllong ia ka jingkhynra kaba kyndit naphang beit bad ban pynjur ia ka jingtalasi ia kiba die bad khaïi drok ha ka jylla.
Mynta ka sngi, u myntri rangbah ula pyllong ia ka jingiathir bad ki heh pulit kynthup ka DGP bad ula ai ka jingbthah kaba tyngeh ia ka tnad pulit ba kan khyrwit bad leh ia ka kam khlem jingtyngkan ban rat dyngkhong ia u drok.
U myntri rangbah ula ong ba watla ki pulit ki la trei tyngeh ha kine ki sngi, hynrei ka la donkam kyrkieh ruh ban kthong ia ki nongkhaïi khutia bad kumjuh ki nongdie lang ia u drok, kaba la pynjot thiaw ia ki khun samla ka jylla.
Wat kito kiba die khutia ha surok ha kyndong ne ha kano kano ka jaka ruh, ym dei ban map satia. U myntri rangbah ula ong ba ki paidbah kin sa iohi ia ki kam ba tyngeh ki pulit ha kine ki sngi ban sa wan ban kyndang ia u drok ha ka jylla.
Ha kajuh ka por, u myntri rangbah ula pyntip ba ka sorkar ka pynkhreh ban buh ia ki detox bad de-addiction centre ha man ki district ha ka jylla. Ula pyllong ia ka jingbishar kam mynta ka sngi ia ka jingpyntreikam ia ka Dream Mission ha ka jylla.
Ka tnad ka koit ka khiah bad ka tnad Social Welfare kan shim ia ki lad ki lynti ban pynbiang ia ki jingdonkam ha ki detox bad de-addiction centre.
Wat map ia ki nongkhaïi drok, ai da kaba tyngeh katkum ka ain, ong u Conrad ia ki pulit
