Shillong: Ka BJP Meghalaya ka la ai jingmut sha ka sorkar jylla ba ka dei ban pynthymmai ia ka rukom treikam ka Meghalaya Public Service Commission (MPSC) ban pyniaid ia ka eksamin Meghalaya Civil Service (MCS)/Meghalaya Police Service (MPS).
Ha ka dorkhas sha u myntri rangbah ka jylla, ka BJP ka la ai jingmut ba dei ban ailad ia kito ki samla kiba ialeh iaka final year ha ka graduation ba kin apply ban iakhun ia ka MCS, MPS, namar ba kumba long mynta, la pdiang tang ia kiba la pyndep ia ka graduate.
U nongaiktien ka BJP Meghalaya u bah Mariahom Kharkhrang ula ong ba ka UPSC ka ju ailad ia kito ki samla kiba ialeh ia ka final year ha ka graduation ban apply ban ialeh ia ka eksamin Civil Services lada ki pass ia ka eksamin ha ka graduation.
Kumjuh ha kane ka jylla, ruh dei ban ailad ia ki samla khnang ban ym duh ei ka lad namar ba ia ka MCS la pyllong shisien ha ka san snem ha kane ka jylla.
Ai lad ia ki samla ba ialeh Degree final year ban ialeh MCS, MPS, dawa ka BJP
