Babu Kular Khongjirem.
Ka Pynursla Constituency kaba kynthup mynshwa ia ki 2 tylli ki Assembly constituency,kata,ka Nongshken bad Lyngkyrdem Assembly constituency ka la thaw sniewbok palat mynta ka kynti.Kitei ki 2 tylli ki Assembly constituency mynta ki la kylla noh tang kawei ka constituency,kata, sha ka kyrteng Pynursla Assembly constituency naduh ba ka la shah pharia ha ka Delimitation of Constituency jong Election Commision ka ri India ha u snem 2013.Dei naduh katei ka snem, ba ka KHADC ruh ka la pharia lang ia ka Pynursla Assembly constituency ha ki 2 tylli ki MDC Autonomous District Council constituency.Kawei kadei kaba don sharum lam sepngi ka shnong Pynursla ba ki ai Kyrteng kum ka Nongshken ADC constituency bad kaba shaneng pat kum ka Lyngkyrdem-Laitkroh ADC constituency.Kumba ka long mynta,ia ka Pynursla constituency la mihkhmat(represented by) da I Bah Duh ne Maduh Prestone Tynsong katba ia ka Nongshken ADC constituency pat la mihkhmat da ka Kong Grace Mary Kharpuri.Baroh 2 ngut ki dei na ka party NPP kaba la lamkhmat ia kane ka sorkar MDA-II ha Meghalaya.
Ka Lyngkyrdem-Laitkroh ADC constituency pat la mihkhmat da I Bah Shemborlang Rynjah na ka party Prah ne VPP. Une u Rangbah u la shah jied ruh kum u CEM ha ka EC jong ka VPP ha KHADC bad u la bat tang kumba shiteng snem tam ne duna.U la iehnoh(resigned) kum u CEM ka KHADC dang ha u bnai September 2025 halor ka jinglong bym koit byn khiah bha ka met ka phad jongu (on health ground).Ka jing iehnoh kam(resigned) jong ia ka kam CEM ka la pynduh mynsiem shi katdei eh ia kiba bun ki paidbah nongkyrshan jong ka seng ‘riewlum ne Seng Trai ri( regional party) kiba la khmih lynti ia u ba u dei tang ma u uban pynliem(defeat) ia u MLA ka pynursla mynta, uba bat ruh kum u Deputy Chief Minister jong ka Meghalaya mynta.Ym tang ki Nongkyrshan ka Seng Trai Ri hynrei wat ki nongialam ba radbah jong u Prah ne VPP ruh ki la duh mynsiem ne duh jingkyrmen bha namar kumno un ialeh pyrshah ( contest) ia ka MLA elekshon na Pynursla constituency ha u snem 2028 khlem ka shuki CEM kat ban pynliem lyndang ia u briew uba dang don ha ka bor bad ka iktiar kum Deputy Chief Minister jong ka jylla.Ka shong ha ka rai bad ka jingkhein politik (political calculation) jong ka party Prah ne VPP la kan pynia khun ne em ia utei u Ex.CEM na Pynursla constituency ha ka MLA elekshon jong u snem 2028.Lada ka party VPP ka la lah ban pynmih answer ba un jop wat la u la pynhiar kyrdan ia lade na ka shuki CEM,kata,kan pynia khun beit ia u.Hynrei,lada ka answer pat ka long da khongpong(negative impact), ka la dei ban wad briew biang da uwei pat u briew uba biang uban lah shisha ban pynliem lyndang ia u MLA ka pynursla uba long ruh u Deputy CM ka Meghalaya.Kumba ka long mynta,ka lyer u Prah ne ka party VPP ka don jingkyrmen bha ban jop na Pynursla Constituency namar ki lah ngiah bad kdang lut ia ki ktien jali ja-um,ka ktien ba thiang kum ka umngap jongu wat ka um ruh imat, kam liat shuh lada theh ha ka kriah ne ka shang.Tangba, lada u Prah ne ka VPP kan wad briew ban pynieng da uwei pat,ka la dei ba kan ai dak(green signal) lypa naduh 2026 ter ter namar lada shu pynbna hak-dak ne kyrkieh bad kynsan kynsan kum long myn ha kane ka MDC elekshon 2024, kan shem jingeh bha ban pynliem lyndang ia u Deputy CM uba long ruh uwei na ki heh spah(crorepati) jong kane ka juk mynta.
Sa kawei pat ka jingduh nong jong ka thain Pynursla ka long,ba, u MLA jongka, uba bat ruh ia ka shuki Deputy Cm mynta u la kyntait hi war ban long ne shimti ia ka shuki Chief Minister.Katkum ka jingpynmih khubor jong ka seng HITO,ka la tyrwa ban pynioh noh ia ka kam Chief Minister da u para Khasi-Jaintia namar kumba 15 snem ei ei mynta la bat sah na ka jait bynriew Garo ia ka shuki Chief Minister ha ka jylla jongngi.Katei ka seng bhalang ka la pynmih ruh ia ka kyrteng ki 3 ngut ki Riew rangbah na Khasi- Jaintia kiba kynthup ia ka kyrteng I Maduh Prestone Tynsong bad Ma Sngiawbha Dhar na ka party NPP bad u bah Metbah Lyngdoh pat na ka party UDP.Ngi iohi ruh dang shen ha ki lad pathai khubor(social media) ba,haba ki kylli ia u Bah Duh Prestone Tynsong la u don ne em ka thong ban shimti ia ka kam ne shuki Chief Minister kumba tyrwa ka seng HUTO,ka jubab kaba shai ba u la ai kalong, ba u kyntait bad um treh satia ia katei ka shuki namar kalong kumba ia jied jait bynriew Khasi-Garo pynban ne ia long Communal pynban.Bun ki paidbah ki lyngngoh bad kyndit ia katei ka jubab jongu.Kumno kumta, lada bat Chief Minister na Garo Hills,kam long communal hynrei lada jied pat da ki Khasi-Jaintia, kalong communal.Ym tang katta,katei ka jabab u MLA ka Pynursla kaba la pynsngewsih lut bad pynduh mynsiem bad pynduh jingkyrmen lypa ruh ia ki nongkyrshan ka party NPP na Pynursla constituency kiba ju khmih lynti bad kanbas ruh man ka MLA elekshon ba u MLA jongki na Pynursla un long lypa beit u Chief Minister jong ka Meghalaya.Mynta,haba u trai met u la kren shai ba um kwah ne um mon ban long Chief Minister,sa kaei pat kin leit pynroh ne leit khring briew na man la ki shnong ka Pynursla constituency.Lada kalong ha kata ka rukom, u MLA ka pynursla ula pynhiar kyrdan hi da lade ia lade khamtam ia ki paidbah nongkyrshan ka Constituency kiba ju khein ne niew ia u kum u syiem ne u ‘lei san snem jong ka thain.Tangba,ngin sa nang ia peit ia ki jingkylla jong ka sainhima- sima ba laiphew jait ha ka Meghalaya jongngi nangne shakhmat bad ruh katkum ka jingtyllun jong ka por.
Thaw sniewbok ka Pynursla (Lyngkyrdem- Laitkroh) Constituency
