Shillong: Ia ka kad liengsuin Umroi yn pynheh biang khnang ban lah ki liengsuih heh ban wan dem bad kit briew. Kumba ka long mynta kane ka kad liengsuin ka heh tang 5000 Square metre, yn sa pynheh sa 5550 Square metre khnang ban pyllah ia ki liengsuin heh ban wan dem bad her na kane ka jaka. Ka jingheh ka jaka kan long baroh 10550 square metre kynthup kaba rim bad kaba thymmai.
Ka jingmang pisa ka sorkar India ban pynheh ka long T. 500 klur.
Halor kane, mynta ka sngi, ka Meghalaya State Pollution Control Board (MSPCB) kala pyllong ia ka jingsngap paidbah ia ki paidbah ka thain Umroi.
Kumba long mynta kiba lah ban dem bad her na kane ka kad liengsuin ki dei tang ki liengsuin kiba rit hynrei ynda la shna pyndep ia kane ka projek thymmai, ki liengsuin kiba heh airbus 320 kiba lah ban kit bad pynhap briew haduh 180 ngut, kin sa lah ban dem bad her.
Na ka liang u nongkren na ka Airport Authority of India (AAI) ula ong ba ka jingpynheh ka long ia ka jaka mareh ne runway bad kumjuh ia ka jaka hiar bad kiew ne ka terminal. Yn ngiam ruh 5 tylli ki liengsuin heh aribus 370 ban ieng ha katei ka jaka.
Ynda la dep ban pynheh ia kane ka kad liengsuin, ki liengsuin nangne kin lah ban her beit sak sha Mumbai, Bangalore, Chennai bad kiwei ki nongbah ka ri India. Kane kan kyntiew ia ka ioh ka kot ka jylla bad kan khring shuh shuh ia ki nongwankai na kylleng ka ri bad nabar ri ban hiar beit sak ha Umroi khlem da donkam shuh ban hiar ne leit sha Guwahati.
Na ka liang ki nongkren kila pdiang ia ka jingpynheh ia kane ka kad liengsuin tangba kila buh kyndon ba ka sorkar ne ka Airport Authority of India ne ka kompeni pynher liengsuin, ki dei ban ai kam kham jur ia ki trai shnong ka thain ba shah ktah bad ki para Khasi wat ia ka kam Pilot ruh lada don ki Khasi hynrei ia ki bym don ki Khasi, ki lah ban khot ia kiba nabar.
Kila kyntu ruh ba ka Airport Authority of India ka dei ban don ka jingiatreilang kaba tista bad ki bor shnong ban lait na kano kano ka jingeh.
Pynheh shi pynheh naduh hyndai, ym ju heh, lada lait kam pilot ruh ai kiba na Bhoi, pdiang ki paidbah ia ka kad liengsuin heh ha Umroi
