Shillong: U Chief Electoral Officer (CEO) ka Meghalaya, u Dr. B.D.R. Tiwari, IAS, ula pyntip ba ka Election Commission of India (ECI), ka la pynkhreh ban pynrung bad bishar bniah ia ki kyrteng jong ki nongthep vote ha ka jylla shi bynta jong ka Special Intensive Revision (SIR) kaban sa leh ha kane ka jylla.
Mynta ka sngi, u Dr. Tiwari ula ong ba ka ECI dang shen ka la pyllong ia ka SIR ha Bihar bad mynta ka la pynkhreh ban pyntreikam ha baroh kawei ka ri.
Ha ka jingpyntreikam iaka SIR ha Bihar ha ki bnai ba la dep, haduh 47 lak ngut ki briew kila shah weng na ka thup kum ki nongthep vote na ka daw ba kim dei ki nongshong shnong ka ri India, nangta kim biang ki kot ki sla bad ki don ruh kiba kynriah jaka bad kiba la khlad.
U CEO ula ong ba ia ka Electoral Roll 2025 lah ban peit ha ka PDF na ka website — https://ceomeghalaya.nic.in/erolls/erolls-gen-ser.html.
Haba kren sha ki lad pathai khubor, u Dr. Tiwari ula batai ia ki dulir ba donkam ban pyrnung kyrteng kum ki nongthep vote ba kynthup ia ka ID card, birth certificates, residence proof, bad ka caste certificate.
U la ong ba katkum ka hukum ka Supreme Court kaba 8 tarik Nailur 2025, la ithuh ruh ia u Aadhaar Card hynrei u dei ban long tang ka jingpynshisha ym dei ban pynshisha pat ia ka jinglong nongshong shnong katkum ka Aadhaar Act, 2026.
Ha kajuh ka por, ula iathuh ba ki polling station kiba don ki nongthep vote palat ia ka 1200 ngut, yn sa bishar ban pynkha shuh. Ha Meghalaya, ki don 27 tylli ki polling station kiba la pynshong nongrim halor kane bad sa 49 tylli ki polling station la pynmih thymmai ban pynsuk ia ki nongthep vote khamtam ha ki jaka ba kham jngai sha nongkyndong. Ki don ruh 12 tylli ki polling station kiba la pyniasoh lang. Ka jingdon ki polling station ha ka jylla ka la kot sha ka 3,615 tylli kaba mut la pynmih thymmai sa 64.
Ka ECI ka la thung sa 35 ngut ki Assistant Electoral Registration Officers (AEROs) bad mynta ka jylla Meghalaya ka la don 126 ngut ki AERO ha ki 60 tylli ki Assembly Constituencies.
Hato yn don ban shah mait kyrteng ki nongthep kum ka Bihar ha ka SIR ha ka jylla
