Shillong: U myntri ka tnad pule puthi ka jylla u bah Lahkmen Rymbui ula ong ba naduh ba u myntri rangbah ula shimti ban ialam ia ka sorkar MDA ha u 2018, ula buh ia ka pule puthi hakhmat duh.
Haba kren sha ki lad pathai khubor, u bah Lahkmen ula ong ba ka sorkar Meghalaya ka kwah ban aiti lut ban pynbha bad kyntiew ia ka pule puthi ha ka jylla.
Kane ka jingong u myntri ka long hadien ba ki nonghikai skul Adhoc hapoh ka lama ka FASTOM kila sangeh ban iakhih hadien ba u myntri rangbah u Conrad K Sangma ula kular ban bishar bniah ia ka jingdawa jongki ban pynkiew tulop noh.
“Naduh ba u shimti ha 2018, u myntri rangbah u Conrad K Sangma ula buh ia ka tnad pule puthi, ka koit ka khiah bad ki jingdonkam. Bad ngi la iohi ba ula pyni shisha da ki kam ym tang ka tyngam”, la ong u bah Lahkmen.
Halor ka jingeh jong ki nonghikai, ula pyrshang ban thaw ia ki lad ki lynti baroh ban pynbeit. Ha snem 2022, ka sorkar ka la pynkiew ia ka tulop ia ki nonghikai watla kam pat long kaba biang namar ba ka jinghiran pisa ka jylla bad mynta ka tnad pule puthi ka la shim ia ki lad ki lynti ban pynbeit ia ka pule puthi ha ka jylla.
“Ka rai ka sorkar ban pynkiew ia ka tulop ki nonghikai kan wanrah ka jingkylla ha ka jingmut jong ki nonghikai bad kan dei ka rai kaba khraw kaban sah kynmaw ha ka jylla”, la ong u bah Lahkmen.
Mar iashimti ha 2018, u Conrad u la buh hakhmat duh ia ka pule puthi, ong bah Lahkmen
