Babu Kular Khongjirem.
Mar ia kut ka Dorbar Assembly, U Chief Minister ka Meghalaya, U Conrad K Sangma u la pynthymmai (re-shuffle) ia la ki myntri barim bad pynrung thymmai da ki khmat thymmai. Wat la ka kam pynthymmai myntri ka dei ka kamram u Myntri Rangbah, hynrei ki don pat bun ki jingiakren bad sngew lyngngoh lut da ki ‘riew paidbah jong kane ka jylla jongngi. Kane ka jingantad bad mutdur ki paidbah ka lah ban dei ne ka lah ruh ban bakla,wat ia thew da kumwei pat halor kane.
Ki party ba iatrei paralok lang bad ka NPP, kum ka BJP, ka HSPDP, ki paidbah kim da sngewpher eh namar ki ju iai pynpaw man ka por ban ia kylliang shuki myntri para ma ki namar ki ia jop ruh tang mar ar ngut ki MLA. Hynrei, kaba kham kyndit bad sngewphylla eh ki paidbah, ka dei ia ki party ba kham heh kum ka UDP bad NPP. Kine ki ar tylli ki party, u Chief Minister u la pynhap wiket jrain-rain-rain khlem poi pyrkhat. Ym don jingmap shuh ia ki wat lada ki dei hok ban neh ha ka shuki ba ki bat ne ki dei kiba kham bit ban treikam bad ki dei ruh ki player ba kham tbit bha ban ialehkai. Ki nongpeit pyrman ia ka sain hima sima ki pyrkhat ba don ki dawbah dawsan kaba la pynlong ia u Myntri Rangbah ban leh kumne.
Ka NPP ka la thaw buit bha jai shwa ban pynhiar bad pynkiew shuki ia la ki MLA namar ka dei kaba la ioh ia ka jingbun paid ha Assembly. Ka drama ka la sdang naduh ba kanebka party ka la phah hiar shuki ia Deputy Speaker u Timothy D Shira na ka kam jongu. Ym tang katta, khlem poi pyrkhat ba ka minister kynthei ba tang marwei, I Dr.Amporeen Lyngdoh in shah pynhiar shuki kynsan kha ma kha khlem poi pyrkhat. Nalorkata, ka Meghalaya ka dei ka jylla ba ai jait kmie bad ba la dep mynjur ruh ban pynlong Ain ban ai bhah lang ia ki kynthei ha Parliament, State Assembly ne ha ki kyrdan minister shi tyllup ka ri India, hynrei, dei tang ka sorkar MDA-II ha Meghalaya ba la lamkhmat da ka party NPP ka bym salia bad bym kheinkor shuh ia kyrdan longkmie. Ka long ka jinglehrain bad jingjah burom ha ri India bad ha ka pyrthei hi baroh kawei ba ka jylla kaba burom bad ai jait sha ki longkmie kum ka Meghalaya, kam ai bhah minister kynthei shuh tdot ia ka hok bad ka bynta ba ki longkmie ki dei hok ban don bynta ha ka sorkar.Ka long ruh ka jingjah burom hakhmat ka pyrthei ba ka sorkar Meghalaya kam burom ia ka kyrdan ki kynthei kat kum ka Reservation for Women kaba la mynjur da ka parliament ha kine ki khyndiat snem ba la dep.
Ha ka MP elekshon 2024, dei i Dr. Amporeen Lyngdoh iba la kohnguh ban long MP kandidiet na ka NPP bad pynlait im artad ia ka party NPP ban lait na ka kynrum kynram ha ka rukom jied MP candidate jong kane ka party. Ha ki kyntien kanbas election lei u president ka NPP Meghalaya State uba long ruh u Deputy Chief Minister (Khasi Hills) u la kren pynroh ba ynda i la jop MP I Dr Ampareen ban leit shong Dorbar ha Parliament bad u Modi ha Delhi da ka riam muka bad dhara khasi, u Modi ruh un iaroh bad lyngngoh bad u Modi un ong”Ka-ha-se-aia” kong Amporeen? Lada i Dr Ampareen in leit Delhi pat mynta, u Modi u lah ban ong kylla,”Ap-Ka-ha-jai-ka, Kong Amporeen”? Hap da ia pyrkhat bha lada phi don buit poh ban shet kylla bad shet sylwa ia kiwei.
Ka drama politik ha ka party UDP ruh kaba itynnad bha. Ban lah ban pynhiar shuki ia u working president jong ka party u Bah Paul Lyngdoh, dei sa tang ban kyntiew kyrdan da u President rangbah jong ka party u bah Metbah Lyngdoh. Lada ki bakla ka plan nangta te, lah jot artad ka iing. Ym tang katta, sha Jaintia Hills ruh kumjuh.U Minister uba la noh synniang bad pynjop donburom ruh ia ki katto katne ki candidate MDC na ka MLA constituency ba u la mihkhmat u Ma Kyrmen Shylla, kam dei satia kaba suk. Dei sa tang u nongialam ba kham rangbah ia u Ma Lakmen Rymbui uba lah ban sloit ia ka shuki minister u Ma Kyrmen Shylla. Tangba kane ka party kam don ka jingpyrkhat lypa ban bujli shuki kum ka HSPDP ne ka BJP. Ki leh da ka jingkyndit tangba ki pynkit pap pat ba ka dei ka rai jong ka party.
Bun bah ki jnit ki jnat ba ki paidbah ki dei ban tip bad sngewthuh lang halor ka jingthmu ba rieh jong kane ka sorkar MDA-II. Don kiba ong, hana, shi taiew shwa ban pynmih ia ki kyrteng minister, ka party NPP ka nang ban pynkmen tohhoh ia kiwei ki kyrteng. Don ki MLA kiba la dep pyniasnoh sha ka party NPP, ki la mih kyrteng ban pynsmai minister. Hynrei, ynda la mih pat ka list ba shisha ban pynsmai minister, ki la shu jah la ka jah kyrteng noh. Lehnoh ei ka sopti coat remdor bad u neck tie ba i khain jongki ba ki mut ban phong ha katei ka sngi pynsmai minister.
Kaei kaba ki paidbah ki dei ban tip kalong ba ym dei ban shu pynlong kum ka mar khaii ne ka khaii-pateng kat ia ka jingpyniaid ia ka bor sorkar ne ka kam shakri paidbah. Tang na ka bynta ka jingmyntoi jongno re jongno khlem da bishar ne pyrkhat shuh ia ka jingbit jingbiang ki paidbah, ka jingtbit ha ka treikam, khlem da peit shuh ia ka kyrdan pule, ka jingshemphang ban treikam bad khlem don jingpyrkhat ia ki kynthei ne longkmie, bad ban shu jied bad thung katba mon kan sa wanrah ka raibi kaba sniew shibun.
Lada ioh long minister 3 ngut 4 ngut shi iing ruh ka biang beit, kam dei satia kaba bha. Ka Meghalaya kan sa sakhi shuh shuh ia bun bah ki jingjia bad jingleh sop sop nangne shakhmat hapoh kane ka sorkar MDA-II ba la ialam da ka party NPP.
Khyndiat shaphang ka Jingpynkylla Myntri ka sorkar MDA-II ha Meghalaya
