Shillong: U MLA na Resubelpara kaba hap ha North Garo Hills u Timothy D Shira ula ong ba um shym la pan ne dawa shuki myntri na u myntri rangbah hynrei ki paidbah ka North Garo Hills ki dawa ban ioh shuki.
Haba kren mynta mynta ka sngi, u Timothy u la ong ba na North Garo Hills District, ka NPP ka jop 4 ngut ki MLA bad ka la don ka jingdawa na ki paidbah ka Garo Hills ba ka donkam ban don u myntri ha ka sorkar jylla.
U Timothy ula risain noh dang shen na ka shuki Deputy Speaker ka ïing dorbar bad ha jaka jongu, la jied ia u Limison D Sangma.
Hadien ba ula risain na ka shuki Deputy Speaker, u myntri rangbah u Conrad Sangma ula pynrung myntri noh ia u ha kane ka sorkar MDA-2.
“Nga khlem pan khlem shuki eiei na u myntri rangbah hynrei, ki don ki katto katne ki paidbah na North Garo Hills kiba dawa ba dei ban ioh shuki myntri na North Garo Hills”, la ong u Timothy.
Ha kajuh ka por, u Timothy ula ong ba ha ka politik ym lah ban iathuh lypa bad mano mano ruh ym lah ban iathuh lypa namar ba wat ka NPP kaba don mynshwa tang 2 ngut ki MLA, ka jop haduh 18 ngut tang na Garo Hills.
Ula ong ba mynta ka Congress ruh kam don MLA kam don MDC shuh ha kane ka jylla hynrei ym lah ban tip, lada ka ioh ia ki nongialam ne ki kyrtong kiba biang, ka lah ban jop biang.
Ka long kaba eh ban iathuh ban kam lypa ha ka sain pyrthei namar ba ka shong ha ka rai jong u paidbah namar ba ha ka elekshon kaba kham mynshwa, ka NPP ka shah rem lut hynrei ha ka elekshon ba la dep, ka la jop bun bha.
Nga khlem pan shuki myntri, hynrei dawa ki paidbah ka North Garo: Timothy
