Shillong: Haduh 17 ngut ki briew kila khlad hadien ba la ther u lapbah lapsan ha Darjeeling, kaba la wanrah ka jingtwa kaba shyrkhei ha katei ka bynta jong ka jaka ka West Bengal.
Ki surok kila dkut, ki jingkieng kila kdiah bad ki ïing kila khyllem na ka jingtwa ka khyndew na ka jingther u lapbah lapsan ha kine ki sngi.
Nalor kiba la khlad, ki dang bun kiba jah rngai ba shah tap bad shah rong ha ka wah kylleng ki bynta ka Darjeeling ha kane ka sngi Saitjain.
Katkum ka kaiphod ka National Disaster Response Force (NDRF) bad ka bor district, ka jingiap ka dei ha ki jak aba kynthup ha Sarsaly, Jasbirgaon, Mirik Basti, Dhar Gaon (Mechi), Nagarakata, bad ha ka thain Mirik Lake.
U Sub-Divisional Officer (SDO) ka Darjeeling u Richard Lepcha ula pyntip ba ka jingiakhun ban pyllait im ia kiba shah ktah ka dang iaid shaphrang bad ka jingleit jingiarapa ruh kumjuh. Haduh mynta kumba 40 ngut ki briew, la ioh ban pyllait im ha Dhar Gaon, Nagarakata ha kaba ki ïing kila shah tap naphang ha ka twa.
U myntri ka North Bengal Development u Udayan Guha ula ong ba ka jinglynshop ka mariang ka long kaba shyrkhei.
Ha kajuh ka por, ka myntri rangbah ka Mamata Banerjee ka la pynbna ia ka jingiarap pisa sha kiba haïing hasem kiba khlad bad kan leit jngoh lashai ka sngi sha North Bengal.
Ki nongwankai kila shah ktah bad bun kiba sahkut ha katei ka thain na kane ka jingkhyrwit ka mariang, bad na ka liang ka myntri rangbah ka la pynthikna ban pynbit pynbiang ban leit shaw ia ki bad kim dei ban kap kap.
Ka Mamata ka la ong ba ka jinghap u slap ka la long kumba 300 millimetres tang ha kine ki 12 kynta, kaba la wanrah ka jingshlei um, ka jingtwa kylleng kitei ki jaka ka Darjeeling.
17 ngut iap ba ther u lapbah ha Darjeeling, dkut ki surok, khyllem ki ïing ruh
