Shillong: Ha u snem 2024, ka jingdon kiba wankai ne tourist sha kane ka jylla ka la kot sha ka 16 lak ngut bad 2.3 lak ki dei kiba wan nabar ri.
Ia kane la iathuh u myntri rangbah u Conrad K Sangma haba kren ha ka jingrakhe ia ka sngi ka kam jngohkai ha pyrthei mynta ka sngi, ka 29 tarik Nailur 2025 ha Marriot Shillong.
Katkum ka jingong u myntri rangbah, ka kam jngohkai ka la ai haduh 50 hajar ngut ki briew ha kane ka jylla bad ka sorkar ka la buh thong ban pynioh kam shuh sa 50 hajar ha ka kam jngohkai ha kine ki snem ban wan.
Ula pyntip ba ki don 210 tylli ki projek kam jngohkai ha kaba ka jinglut ka la long T.3625 klur.
U la ong ba ka tnad DoNER ka sorkar India ka la mang sa T. 260 klur na ka skhim PM-DevIne na ka bynta ban kyntiew shuh shuh ia ka kam jngohkai ha Sohra bad ki shnong ba marjan.
U la iathuh ba ha u snem 2027, ka kad liengsuin ha Umroi kan lah ban pdiang ban wan dem noh ki liengsuin heh bad kane kan pynsuk bad kan kyntiew shuh shuh ia ka ioh ka kot ka jylla. Ula ong ba ha ka National Games 2027, ka sorkar ka la pynkhreh ruh ban pynsah ia ki nongialehkai ha ki Homestay kylleng ka jaka.
Ha kajuh ka por, u la ong ba ka jingpyllong ka sorkar ia ki tamasa ha u snem 2024 ka la wanrah shibun ka jingmyntoi ia ka jylla. Ula ong ba ka jylla ka la pyllut T. 23.5 klur katba ka jingmih pat ka long T.133.43 klur.
Ha kane ka sngi, u myntri rangbah ula pyllait ruh ia u Helpline Number ka kam jngohkai 1800-599-2026 bad lah ban ioh jingtip haduh 7 tylli ki jait ktien naduh ka por 8AM haduh 8PM.
Ula pynbna ba ka Chief Minister’s Meghalaya Homestay Mission ka ai jingkyrshan 70% kum ka subsidy bad ka sorkar ka la buh thong ban ai jingshna 3,000 tylli ki homestays bad baroh kan kot sha ka 6,000 tylli ki kamram haduh ba kut u 2028. Ka sorkar kan ai jingiarap ruh T. 2 lak na ka Meghalaya Homestay Scheme ia kito ki bym pat ioh hynrei kiba la shna mynshwa.
Hapoh ka skhim Meghalaya PRIME Tourism Vehicle Scheme, u myntri rangbah ula pyllait sa 10 tylli ki kali rem dor ban kit nongleit nongwan ha ka kam jngohkai.
Ha kane ka sngi, la sam khusnam ruh sha kiba ioh ia ka Outlook Magazine’s Responsible Tourism Award.
50,000 ki ioh kam na ka kam jngohkai| ki nongialehkai yn pynsah ha homestay ha 2027: Conrad
