Shillong: Ki Pulit Assam ha ka step phyrngab jong ka sngi u Blei 28 tarik Nailur kila ïoh ban siat iap ia 4 ngut ki snar ka kynhun runar ha ka jingiather kuli hajan Ghiladubi, kaba don marjan ka khappud Assam-Meghalaya ha ka thain ka Goalpara District.
Kine kiba iap ki dei kiba la tip kyrteng da u Mukunda Rabha, Subur Ali, Zahidul Islam bad u Chengbat Marak.
Katkum ka khubor na ki Pulit la ïathuh ba kane ka kynhun ki runar ka dang thmu ban lute na uwei u nongkhaïi ka thain, ha kaba ki Pulit kila pynlong ia ka jingkhynra haba ioh ia kane ka jingtip bad ia kane ka jingkhynra la ialam da u SP ka Goalpara, u Navaneet Mahanta bad u SP ka South Salmara-Mankachar, u Abhilash Barua.
La ïathuh ba ka kynhun ki Pulit ka sdang tur, ki runar kila ther kuli, kaba la pynbor ia ki Pulit ban pynphai kylliang. Ha kane ka jingther kuli, arngut kila iap hashen katba arngut kila mynsaw jur bad khlad noh hadien ba poi ha Dhupdhara Model Hospital.
Ki pulit ki la ïathuh ba na katei ka jaka ba ïasiat la ioh kurup ia 4 tylli ki pistol, ki kuli, ka kali bad katto katne tylli ki mobile phone, bad ha ka jingtohkit la lap ba kane ka kynhun runar ka dei kaba donkti ha kiba bun ki kam tuh bad khaii tiar siat ha ka thain.