Shillong: La seng ia ka Synjuk Ki Rangbah Kur Ka Bri U Hynñiewtrep ha ka 7tarik Kyllalyngkot 2019 ba la lam khmat da u Bah H S Shylla (ban kwai ha dwar U Blei) ha ka khep ba u dang bat ia ka iktiar jong u Khlieh Rangbah (CEM) jong ka Dorbar Thawaiñ Dalariti (KHADC) ryngkat kiwei kiwei ki para rangbah. Naduh ba la seng la buh ia ka thong ban pynneh pynsah ia ka riti dustur kheiñkur kheiñkha na ka kmie lyngba ka Dorbar Thawaiñ Dalariti. Ha kane ka jingpyrshang la ia takhuh shibun ki dieng pyngkiang, hynrei khatduh la lah ban pynlong aiñ ba la tip kum ka KHASI HILLS AUTONOMOUS DISTRICT (KHASI SOCIAL CUSTOM OF CLAN LINEAGE) AMENDMENT ACT, 2023. Hynrei ki jingeh ki dang iai tyllep bad ka Synjuk Ki Rangbah Kur Ka Bri U Hynñiewtrep ka la pynlong ia ka Dorbar Bah III ha ka 27tarik Nailur 2025, ha ka ba la ia tai sani halor kane ka phang ryngkat u Kongsan Bah Strongpillar Kharjana, Shongknor ka Dorbar Thawaiñ Dalariti, u ba la kdew byllai ki jinglong jingman ha ka imlang sahlang ba ia tyngkhuh manla ka sngi. U la maham ba ka longrynñieng jong u kñi ka long ka ba donkam ban tei ia la ka kur ka jait lyngba ka sneng ka kraw bad da ka jingkitkhlieh bad ban long na lade hi ka nongmuna na ka bynta ka pateng longkur longjait.
Kiwei kiwei ki kynrem ba la don lang ha ka Dorbar Bah III jong ka Synjuk Ki Rangbah Kur ki long u Bah M B Kharlukhi, Myntri, Dorbar Hima Mylliem, u Dr K M Syiemlieh, syiem Khynnah Hima Nongkhlaw bad Khlieh rangbah ka Synjuk ki Hima Khasi, u Bah Robert June Kharjahrin, u Bah Pyniaid Sing Syiem, CEM barim ka KHADC, u Dr B P S Toi, rangbah kur u ba la pyniaid ia ka riti pynskhem ia ki dkhot nongkitkam ka Synjuk ki Rangbah Kur na ka bynta ka samoi 2025 haduh 2028. ha ka sienshong ka ba ar la shim bynta da ki rangbah kur na kylleng ka thaiñ ba kynthup ia u Bah D Donstan Khonglah na War Jaintia, Bah Ploster Syiem na Ri Bhoi bad katto katne ki rangbah na ka lympung paidbah ki ba la ia kdew bad pyni ia ki lad ki lynti ban pynneh pynsah bad ban iada na kino kino ki jingpyrshang ki ba pynbyrsieh ia ka riti dustur tynrai.
Ha ka ba jied ia ki dkhot nongkitkam thymmai ba la pyniaid dfa u Dr B P S Toi, ka lympung ki rangbah kur ha ka Dorbar Bah ki la mynjur ia u Bah R L Kharpran kum u Khlieh Rangbah, Raphael Warjri kum u Saiñpyniar Lumlang, bah Aristotle Lyngdoh, Bah Ploster Syiem bad Bah D Donstan Khonglah kum ki symbud khlieh rangbah, Erland Sun kum u Batsaipan, bah Rapionglang Blah kum u sangot ryngkat bad khathynriew ngut ki dkhot rangbah nongkitkam jong ka Synjuk Ki Rangbah Kur.
Dorbar Bah III jong ka Synjuk Ki Rangbah Kur
