Shillong: Dang shen, ka jingkynnoh kawei ka khynnah skul ba shah lute da kaba pynap tari ha thain Nongthymmai, Shillong ka la wanrah ka jingsuhjer ia ki paidbah ka sor Shillong.
Hynrei hadien ka jingshim khia ki pulit ban tohkit, la shaiong ngain ba la shem ba kane ka khynnah ka shu thok shu lamler pynban.
Ha ka 25 tarik Nailar 2025, kawei ka khynnah skul ha Lumïablot, Nongthymmai ka la kam ba ka shah lute T. 300 ha saw ngut ki briew da kaba pynap da ka tari.
Ha ka kyrwoh u Superintendent of Police ka East Khasi Hills, bah Vivek Syiem mynta ka sngi, ula ong ba katei ka khynnah ka la phla ha u nongbishar ka District Court ba ka la thok bad shna khana ïa katei ka jingjia namar ba ka la ai ïa ka pisa T.300 ha u paralok ban pynthied tiar online, bad namar ba ka sheptieng ioh ba un pynlut baroh ka pisa, ka la shu thaw khana ba ka shah lute.
Na ka liang ki pulit ki la pynkut da kaba ong ha kam shym la don satia kane ka jingjia bad kaei kaba la mih ha ki lad pathai na ka jingïathuh katei ka khynnah kam dei kaba shisha. Ki pulit ki la pynkynmaw ruh ba ka jingmudui ne ai jingtip ba thok ha ka ejahar (FIR) ka dei ka kam beaiñ kaba lah ban shah pynshitom.
Shu lamler ka khynnah skul ba shah lute ba tieng ioh u pyllut ia ka pisa
