Shillong: U sordar ka shnong Nonghali u bah Hunboklang Mynsong ula ong ba ka shnong kam shym la khang ia ka Synjuk ki Nongsynshar Shnong Par Umkhen ban wan sha ka jingsngap paidbah bad la shna khnang ia ka pandal kaba heh ba kin wan.
Hynrei ka jingshah khang jongki ha shiteng lynti, ka dei namar ba ki don kawei ka jingthmu ban wan sha kane ka jingsngap paidbah kaba lah ban wanrah ka jingpynthut ia ka jingsngap paidbah.
Ula ong ba kaei ka jingmut jongki ban ialam ia ki paidbhur na ki 15 shnong ka bym don jingiadei shuh ia kane ka projek buh jaka theh niut, ka mut ka don eiei sha lyndet. U la ong ba lada ki kwah ban ai jingkren ki lah ban wan ki nongialam, ym ban wanrah pynban da ki paidbhur.
U bah Hunboklang ula ong ba ia ka jingthmu jong kane ka synjuk ban ujor sha ka sorkar ia kane ka jingsngap paidbah, ka shong beit ha ki namar ba ka iadei bad ka sorkar.
Ha kajuh ka por, u sordar ula ong ba ka shnong ka la wad jingtip bniah shwa ban pdiang ia kane ka projek bad ka la don ruh ka jingiateh ba ka wah umkhen kam dei ban long ka jingma na ka jingdon kane ka jaka theh niut.
U la ong ba ka jingjaboh ka Mawlai Marten ka dei namar ba ka sorkar ha kato ka por kam pat don ka juk stad ban leh kum mynta nalor ka jaka kaba rit hynrei ha Nonghali kin pyndonkam da ka juk stad kaba biang nalor ka jaka ruh kaba heh kumba 200 akar.
Ka jingsngap paidbah ka la iaid beit khlem kano kano ka jinghuri hura ha kaba la ioh ban pynpaw na kiba kyrshan bad kiba pyrshah ruh kumjuh.
Ha kawei ka liang, u bah Supar Rngaid u President jong ka Synjuk ki Nongsynshar Shnong Par Umkhen, ula pynpaw ia ka jingsngewsih halor kane ka jingthmu ka sorkar ban buh ia ka jaka theh niut ha katei ka jaka namar ba kan ktah ia ka wah Umkhen, kaba bsa ia ki paidbah.
U la ong ba kin shong ka jingialang ban ai ruh ka Shithi sha Ka Sorkar namar ba ki khlem ioh lad ban rung ban sngap iaka jingialang Paitbah.
U Bah Supar u la pynpaw ka jingbitar ia ka shnong Nonghali ba kin buh da ki Volunteer ban khang lynti iaki ban rung shapoh ka jingialang paitbah. U la ong ruh ba na ka liang ka bor jong ka District ki la ai da ka shithi sha ki ban iawer iaki Paitbah ban wan ban sngap ia ka Jingialang paitbah hynrei phewse ki khlem ioh lad ban rung shapoh bad kim hun ia kane ka jingleh ban khang lad ia ki.
Kiba thmu ban pynthut ki dei nabar shnong: Sordar Nonghali, Yn tep ka jaboh ia ka wah Umkhen: Synjuk ki Nongsynshar Shnong Par Umkhen
