Shillong: U myntri ka tnad PHE u Marcuise N Marak ula ai nguh ia u Blei uba la pyllong ia u myntri rangbah ka jyllla u Conrad K Sangma ban pynneh ia u ha ka shuki myntri.
Lah ban kdew ba dang shen, 8 ngut ki myntri kila shah pynhap shuki ha u myntri rangbah u Conrad K Sangma bad thung bujli pat da kiwei ha kane ka sorkar MDA-2.
Haba kren mynta ka sngi, u Marcuise ula ong ba ula don ha ka NPP naduh ba sdang bad hapdeng ka jingiaid lynti ka iakynduh shibun ki jingeh bad ka jinglong kohnguh kum u briew ka party, ka la pyllong ia u ban neh ha ka shuki. Kum u myntri ula kular ban trei tyngeh kham jur nangne shakhmat.
Ha kajuh ka por, u la ong ba kane ka dei ka sorkar synrop, bad hap ban pyniahap tara lang hapdeng baroh ki paralok na kiwei ki party kiba don lang ha ka sorkar. Ha ka jingshisha, ka NPP ka don 33 ngut ki MLA hynrei kam kwah ban shet ia kiwei ki paralok haka sorkar. U la ong ba ka lah ban don ka jingsngew ktah ia kito kiba shah pynhap hynrei mynta kila kmen bad kila sngew hun.
Ai nguh ia u Blei ba u CM u pynneh shuki ia nga: Marcuise
