Shillong: Ka Central Empowered Committee (CEC) ka la aiti ia ka jingai jingmut sha ka Supreme Court kaba lah ban ktah jur ia ka jinglong trai ia ka jaka, ka jingpyndonkam ia ka jaka ha kane ka jylla Meghalaya.
Ka CEC ka la ai jingmut ba baroh ki surok, ki jingtei, ki skul, ki college, ki karkhana bad kiwei ki jingtei ha ka jylla Meghalaya dei ban pynbna kum ki khlaw ne “Recorded Forest” haduh ban pyndep ia ka jingpynshisha katkum ka rukom. Ki nongshong shnong ka Meghalaya ki sheptieng ba kane ka lah ban shah pynngat ia ki ïing ki sem, ki jaka khaïi pateng, bad ki jingtei jong u paidbah kum kita kiba long beaiñ, kaban iasyriem kum ka jingkhang dewiong mynshwa ha ka jylla.
Kane ka Committee ka la ai jingmut ruh ba dei ban khang tih maw tih shyiap katkum ka samoi man u snem, kaban long hapdeng u Jymmang haduh u Nailur ha ka Meghalaya bad dei ban ailad ban tih tang ia ki kam ba donkam kyrkieh lyngba ka jingbit na ka bor ba dei peit.
Ka CEC ka la ong ba baroh ka thain Mylliem shaduh Byrnihat, Khanapara dei ban pynbna kum ka jaka pynneh pynsah ia ki khlaw ne Reserve Forest bad dei ban leh ia kane hapoh shi snem, tangba ki jaka shimet jong ki trai muluk kim dei ban shah ktah.
Kawei ka jingai jingmut kaba kham ktah ka long halor ka University of Science and Technology, Meghalaya (USTM), kaba la ong ba ka USTM ka la skud ia ki jaka khlaw khlem ka jingbit na ka sorkar India. Ka Committee ka la ai jingmut ban pynsangeh ia baroh ki kam ki bym iadei bad ki khlaw ki btap, ban pynkylla biang ia ki jaka sha ki jaka khlaw hapoh shi snem bad ban dain kuna la kumno ₹150 klur ia ka USTM bad kiwei ki institution kiba iadei bad ka.
Shuh shuh ka Committee ka la ai jingmut ban pynneh ia ki khlaw na ka bynta ka Basistha-Bahini bad ka Dighalipani watershed, ban pyntreikam hapoh ka jingpeit ka Union Ministry of Environment, Forest and Climate Change (MoEF&CC).
Kane ka jingai jingmut ka SEC ka la wanrah ka jinglynga mynsiem ia ki paidbah ha Ri-Bhoi bad ha East Khasi Hills, ha kaba kila sheptieng ba ki ïing ki sem, ki jaka pule bad ki jaka khaïi pateng kum ha Baridua, Killing bad ha Khanapara kin shah pynlko noh lada ka Supreme Court ka pdiang ia kane ka jingai jingmut.
Ia ka sien shong jingbishar halor kane la buh da ka Supreme Court ha ka 11 tarik Risaw ban wan.
Pynbna jaka khlaw naduh Mylliem shaduh Khanapara, Dei ban daiñ kuna T.150 klur ia ka USTM: CEC sha SC
