Shillong: Kumba 8000 ngut ki nonghikai skul naduh Lower Primary haduh Higher Secondary skul hapoh ka lama ka Federation of All School Teachers of Meghalaya (FASTOM) kin pyllong ia ka jingiakhih khlem pud da kaba shong kyraiñ ha Shillong bad ha kiwei ki jaka ban pynbor ia ka sorkar ban pynrung Deficit noh ia ki nonghikai skul Adhoc.
Mynta ka sngi, ka 22 tarik Nailur 2025, kila pyllong ia ka jingiaid kjat sha Lachumier, Barik shaduh Madan Malki ban pyllong ia ka jingialang paidbah.
U Vice President ka FASTOM u bah Sanborn Jungai ula ong ba watla ki Khasi kim da iatylli ban wan iashim bynta hynrei ka donkam ka jingshynrang kampher lada don tang khyndiat ruh.
Ula ong ba ki don kiba la hikai la 30 snem hynrei kajuh ka tulop bad u nonghikai uba dang shu wan mynta bad kane ka paw ba ka sorkar kam shym la shim khia ia ka pule puthi, hynrei ka heh tang ka tyngam. U la ong ba ka sorkar ka la tyrwa ban siew tulop lem ia ki nongtrei jong ki district council, balei ia ki nonghikai pat kam leh.
La iathuh ba katkum ka jingtip, kam don eiei ka jingai jingmut na ka State Education Commission ban kyntiew tulop ia ki nonghikai Adhoc bad halor kane, kila dawa na ka sorkar ba kan leh eiei ia ki. Ula ong ba ki nonghikai Adhoc kin shong kyrain beit khlem pud haduh ba ka sorkar kan pynthikna ban ai ia ka jingdawa jongki ban pynrung deficit noh ia baroh ki nonghikai Adhoc ha ka jylla.
Kila buh jingkylli lada ka sorkar jylla ka kloi ban tyrwa siew tulop ia ki nongtrei jong ki District Council, ka don jingeh aiu ba kan shimti deficit ia ki nonghikai skul Adhoc.
Kila kam ruh ba katkum ka jingkhein na ka tnad pule puthi ka jylla, kumba 1,18,429 ngut ki khynnah skul bad na kine, 12500 ki pule ha skul sorkar bad 1800 ki pule ha Private skul bad kumba 104,000 ki khynnah ki pule ha Adhoc ne Grant In Aid skul ha ka jylla.
Ka sorkar ka siew tulop ia ki nongtrei ki ADC, don jingeh aiu ia ki nonghikai Adhoc pat: FASTOM
