Shillong: Ka jingsyier ki kmie ki kpa bad ka imlang sahlang ha kine ki sngi, kala jubor haduh katta katta ha kaba ka jingsngew shngain ka long synjor na ka jingshyrkhei ki kam runar.
Ha kawei ka jingjia, uwei u khynnah ba dang 7 snem eiei, ula lait na tyrsim ki runar, ha kaba la suba jur ba ki thmu ban rahbor ia u.
Kane ka la jia ha ka shnong Lad Mawreng ha kane ka sngi Nyngkong ha kaba uwei u khynnah ula lait na ka tyrsim ki runar kiba la pyrshang ban khroh bad pynbiej ia u.
Hynne ka sngi ruh, la mih ka khubor ba don kawei ka jingjia ha thain Laitkor kaba iasyriem kumjuh hi, ha kaba ki don kiba pyrshang ban kthong ia ki khynnah skul.
Ka don ruh ka jingjia ha Lummawbah kaba iasyriem kum kane ka jingjia. Kane kala wanrah ka jingsngew syier ka jingsmiej ia ki paidbah khamtam ia ki kynthei ki khynnah.
Hynrei haduh mynta ym pat lap dak satia hato ka dei kaba shisha ne em, ne ka bor jong ka ain, kala leh eiei ne em ban buddien ia kum kine ki jingjia ne kin ap ban ioh shwa ia ka jingujor.
Katkum ka jingjia ha Lad Mawreng, la iathuh ba ki don ki briew kiba shong ha ka kali scorpio rong iong khlem number, kiba pyrshang ban rahbor ia uwei u khynnah hynrei ula lait na ka tyrsim ki runar.
Halor kane, na ka liang u rangbah shnong ka Lad Mawreng, u bah Craft Kurbah ula kyntu ia ki shnong ki thaw, ki kmie ki kpa, bad kumjuh ka imlang sah ba kin long kiba husiar bha namar ka sngew syier na ki jingjia ba lai phew jait.
Ula kyntu ia ka bor sorkar ba kan thaw lad ban buh noh da ka CCTV bad ka street light kaba khlain khnang ba kan long ka jingshngain ia ki paidbah.
Nang jur ki jingsngew syier, ba nang mih ki jingjia ba shah kthong ki khynnah
