Shillong: Ka kmie jong u samla Pynskhemlang Kharkhrang uba na Umroi Nongrah, ka kong Snora Kharkhrang kala ujor sha u Chief Secretary ka jylla ban iarap lem ban wad ia u khun jongka, uba la jah la ar bnai eiei mynta.
Ha ka shithi sha u Chief Secretary ha kane ka taiew, ka kong Snora kala ong ba katkum ka jingtip ba ki ioh, u khun jongka, ula ngam jyllop ha pung Umiam ha ka 26 tarik Naitung hynrei wat hadien ba la wad da ki NDRF, SDRF, bad ki Search & Rescue Team kim shym la lap satia, bad kane ka la buh ia ka iing ha ka jingdum.
Ha ka jingshisha, kila pyntip sha u SP ka East Khasi Hills bad ki pulit ka Mawlai Police Station hynrei kum ka iing kim ioh ia ka jingtip kaba hun bad kila artatien ba u khun jongki, un ngam jyllop ha ka pung Umiam hadien ba ki briew kiba la tohkit kila kyllain ka rukom jubab.
Lah ban kdew ba wat ka shnong Umroi Nongrah ka la pyllong ia ka jingwad shnong ia une u samla ha ki taiew ba la dep hynrei khlem lap satia.
Kiba haiing kila suba jur ba ka lah ban don eiei da kumwei pat kaba la pyllong ia u samla Pynskhem ban jah klep haduh kine ki sngi.
Kyrpad ka kmie u samla ba jah la ar bnai ha u Chief Secretary
