Shillong: Ban khlong ia ki marpoh khyndew kiba remdor bad kiba donkam na ka bynta ka jingshngain bad iada ia ka ri kum u Uranium, Thorium, rare earth element, ym donkam shuh ban sngap ia ki paidbah ne ban pyllong ia ka jingsngap paidbah, hynrei ka sorkar ka lah ban tih beit ia ki.
Ka tnad Ministry of Environment, Forest and Climate Change (MoEFCC) ka la mynjur ia kane ka jingpynkylla, ha kaba ka sorkar India ka lah ban tih ia u uranium, thorium, rare earth elements kiba iadei bad ka jingshngain jong ka ri khlem da donkam shuh ban sngap ia ki paidbah ne ban pyllong ia ka jingsngap paidbah.
Katkum ka Union Ministry of Environment, Forest and Climate Change (MoEFCC), kine ki marpoh khyndew ki donkam ia ka jingshngain ka ri.
Ka Environment, Forest and Climate Change ka la rai ba katkum ka kyndon jong ka Environmental Impact Assessment (EIA), 2006 bad ha kaba iadei bad ka jingdonkam ka ri, baroh ka jingtih ia ki marpoh khyndew katkum ka Part B ka First Schedule jong ka Minerals and Minerals (Development and Regulation) Act bad ki marpoh khyndew kiba pynbna ha ka Part D la pyllait noh na ka jingsngap paidbah ne public hearing, la ong ka MoEFCC ha Office Memorandum (OM) kaba la pynmih ha 8 tarik Nailur, 2025.
Ym donkam sngap ia paidbah ban tih uranium, thorium, mynjur ka MoEFCC ka sorkar India
