Shillong: Ka seng ki nongniah kali kamai na Meghalaya ka All Khasi Meghalaya Tourist Taxi Association (AKMTTA) ha ka 16 tarik Nailur 2025, ka la sam kot stem ha kylleng ki jaka ia ki kali kamai na Assam.
Ha kane ka kot stem, la thoh shiphew tylli ki mat jingdawa ka AKMTTA bad kita ki long ban don ka policy halor ki Tourist Taxis ban pyrkhat kyrpang ia ki trai bad ki nongniah kali kiba dei ki Schedule Tribe. Kawei pat ka jingdawa ka long ban don ka Road Transport Agreement kaba iasyriem kum ha jylla Sikkim bad West Bengal, lane Odisha bad ka Jharkhand. Ka la dawa ruh ban Reciprocal Transport Agreement kaba iasyriem bad ki jylla Delhi, Haryana, Rajasthan bad Utter Pradesh.
Ka sorkar ka dei ban bishar bniah ia ka United Khasi-Jaintia Hills District (trading by Non-Tribals) Regulation 1954 bad 1959. Shuh shuh ka la dawa ruh ba ka sorkar ka dei ban shna ia ka Motor Vehicle Rule ia ki kali kamai ha jylla.
Ka jingdawa ka long ruh ba ka sorkar jylla ka dei ban iakren bad ka sorkar Assam halor ka jingheh tasam ka khajna ia ki kali kamai ha kad liengsuin, steshon rel. Kawei pat ka jingdawa ka long ba ka donkam ban don ka jaka ieng kali kamai kaba biang khnang ban lait na kaba shu iaid da ieng kaba la wanrah ka jingsahkut kali. Ka AKMTTA ka kwah ruh ban don ka jingiadei kaba khlain hapdeng ki nongpyniaid kali kamai bad ka tnad jngohkai, ki pulit bad ka tnad ka kit ka bah ka sorkar.
Kawei pat ka jingdawa ka seng ka long ba ka sorkar ka dei ban shna ia ka Tourist Taxi App ban pynsuk ia ki nongleit nongwan bad kaba shiphew ka long ba ka long ban ai lad kyrpang ia ki samla na kane ka jylla ban pyniaid ia ki kali Prime Vehicle.
Sam kot stem ka AKMTTA ia ki kali kamai na Assam
