Shillong: Hadien ka jingtohkit kaba bniah halor ka jingjah bad jingshah pynïap i heprit Insaphira Lyngdoh Mawnai ba dang 4 snem ka rta ha Nongrah Nonglum Brei, ki pulit ki la lah ban wanrah ïa ka jingshisha, bad ka jingshisha katkum ka jingïathuh u Superintendent of Police ka East Khasi Hills, Bah Vivek Syiem, uba leh ïa kane ka kam dei u khynnah ba dang 13 snem, uba sah marjan bad ba ju leit kai ruh ha ïing i heprit Insaphira. bad uba kam ba ïohi ïa ka Scorpio rong ïong ha ka por ba jah i heprit.
U la ïathuh ba ha katei ka jingtohkit, utei u khynnah u la rah ïa i heprit na jrong kynroh bad ïalam sha ka jaka ba dang shna ïing, ha ka jaka ba lap ïa ka met ïap, ha kaba utei u khynnah u la btuit bad pynur ïa i heprit ha katei ka jaka ba dang trei kaba lang um, bad i heprit Insaphira i la ngam jyllop bad kdang um.
U SP u la ïathuh ba ha ka jingtohkit ïa utei u khynnah la lap ruh ïa ka dien mong ha kjat kaba pyni ba ka dei shisha ba u btuit, bad la ïathuh ba ïa utei u khynnah la rah sha Juvenile Home bad yn bishar da ka Juvenile Justice Board.
Katkum ka jingïathuh u Bah Vivek, ka postmortem report ka kdew ba ka jingïap i heprit ka dei ba kdang um, bad kam don kano kano ka dak mynsaw ha ka met.
Na ka liang u SP u la ong ba kane ka long katkum ka jinglap na ka jingtohkit haduh mynta, bad na ka SIT kan dang tohkit kham bniah shuh shuh hashwa ban pynkut ïa kane ka case.
Phla u khynnah 13 snem ba iap jyllop i heprit ha Nongrah
