Shillong: Ki 8 ngut ki Myntri thymmai ka Sorkar Meghalaya Democratic Alliance (MDA II) ki la bam smai mynta ka janmiet jong ka 16 tarik Nailur. Ïa kine ki Myntri ba thymmai la pynbam smai da u Lat ka Jylla, u CH Vijayashankar, bad la sakhi lang ruh da ki Myntri Sorkar kynthup u Myntri Rangbah, Conrad K Sangma, Bah Prestone Tynsong, Baj Sniawbhalang Dhar bad Marcuise N Marak, nalor ki heh ophisar bad ki nongïalam ki seng ba ïatreilang hapoh ka Sorkar MDA.
Ki Myntri Thymmai ha ka Sorkar MDA II ki long, u Deputy Speaker barim bad MLA ka Resubelpara, u Timothy D Shira, u MLA ka Dalu, u Brening A. Sangma, u MLA ka Jirang, u Bah Sosthenes Sohthun, u MLA ka Jowai, u Bah Wailadmiki Shylla, u MLA ka Mawshynrut, u Bah Methodius Dkhar, u MLA ka South Shillong, Bah Sanbor Shullai, u Speaker barim bad MLA na Mairang, u Bah Metbah Lyngdoh, bad u Myntri barim bad MLA na Amlarem, u Bah Lahkmen Rymbui.
Ha kane ka jingbyjli Myntri ka NPP kaba ïalam ïa ka Sorkar ka la pynhiar shuki 4 ngut ki Myntri ba kynthup ïa Ka Kong Ampareen Lyngdoh, Bah Comingone Ymbon, u Abu Taher Mondal bad u Rakkam A Sangma, ka UDP ka la bujli baroh arngut ki Myntri, u Bah Paul Lyngdoh bad Bah Kyrmen Shylla, katba ka HSPDP bad BJP kiba don mar 2 ngut ki MLA ki la bujli noh da uwei pat ha ka jaka u Bah Shaklair Warjri bad Bah AL Hek.
Ha kane la jingpynsmai ïa ki Myntri Thymmai ki Myntri barim kiba khlem poi ki long ka kong Ampareen, Bah Paul Lyngdoh bad u Rakkam A Sangma.
Mar ia dap 2 snem shiteng, bam smai 8 ngut, hap shuki 8 ngut ha ka sorkar MDA-2
