Shillong: U nongthoh poitri ne u Myllung ba pawnam na ri America u Bob Holman bad ka nongdro ba pawnam ka Sono Kuwayama kila wan jngoh ia ka Sieng Riti Institute, Wahkhen ha kane ka sngi u Blei.
Ha kane ka jingwan jngoh jongki ha ka jingialam ka kong Rida Gatphoh kila kyndit ban iohi ia ka jingphylla jong ka spah hyndai ba ka Sieng Riti ka la lah ban pynneh pynsah ha ka tem ka put, ka rwai ka siaw bad ki jingshna jingthain kum ka thain syr-ia.
Ula iohi ruh ia ka jingphylla ia ki tiar put tiar tem Khasi kiba la batai ia ki jingmut jongki, da u Rangbah Komik Khongjirem uwei na ki duhalia ba pawnam ha ka ri. Ym tang katta, ula lyngngoh bad iaroh ban iohi ia ki khynnah kiba shah hikai ha ka Sieng Riti kynthei bad shynrang ki tbit bha ban tem, bad kaba kham pynlyngngoh ia u, ka long ba ki khynnah kia Sieng Riti kila pyni ruh ia ka jingrwai sur, kaba um pat ju iohi shano shano ruh.
U Bob bad ka Sono kila thied ruh ia ki syr-ia kiba thain ki longkmie ha kane ka Sieng Riti. La pdiang burom ruh ia u da u Secretary ka Sieng Riti u babu Snar S Malngiang.
Wan jngoh u myllung na America ia ka Sieng Riti ha Wahkhen
