Shillong: U Myntri Rangbah ka jylla u Conrad K Sangma ula ong ba ka sorkar kan ym kwah ban thom da ka bor ban shimti ia ki nonghikai deficit skul hynrei ka iasyllok lada ka don ka lad kaba kham biang.
Haba jubab halor ka jingkylli kaba iadei bad ka tnad pule puthi mynta ka sngi hapoh ka iing dorbar, u Conrad ula ong ba ka sorkar ka ngeit ha ka jingiamir jingmut, ka jingiasyllok bad kan don satia kano kano ka jingong ba ka sorkar kan thom da ka bor da lei lei ruh em.
Ka sorkar kam don eiei ka jingthmu ban thom ban shimti ia ki skul ne ban pynkut ia ka deficit system.
Ka la don ka jingdawa na ki nonghikai Deficit ban shimti ka sorkar tang ia ki nonghikai da ka provincialization hynrei ki don pat ki bym kwah bad ka sorkar ka dang eksamin ia kane ka kam.
U myntri rangbah ula pyntip ba ka sorkar ka pyllut kumba 1100 klur tyngka man u snem ban iarap ia ki skul bad college bym dei jong ka sorkar na ka bynta ban siew ia ka tulop ki nonghikai katba ka pyllut tang kumba 600 klur tyngka ban siew ia ki nonghikai skul ka sorkar.
U la ong ruh ba ka sorkar ka dang eksamin ruh ia ka jingdawa ban pynheh ia ka jingiarap ia ki skul shimet namar ba kan hap ban pylllut shuh sa kumba 200-300 klur eiei tam kaban kot sha ka 1400 klur ha ka shi snem.
Shwa ia kane, u myntri ka tnad pule puthi ka jylla u Rakkam Sangma ula pyntip ba ki don 3361 tylli ki Lower Primary Deficit, 881 tylli ki UP, 2363 tylli ki Secondary School bad 186 tylli ki Higher secondary school kiba hap ha ka deficit.
Ia ki nonghikai la thung da ki School Managing Committee bad ka sorkar ka shu ai tang ka tulop.
Ka sorkar kan thom kum ka puhshilum ia ki nonghikai deficit ne ki skul shimet: Conrad
