Shillong: U nongialam ka liangpyrshah u Dr. Mukul Sangma ula maham ka jingbthei ka jingiakhih ha ri Nepal, kan dei ka jingphira ia ki nongsynshar bad ia ka sorkar, ba kim dei ban leh thawnang ia ki samla namar ba ynda la kiew ka jingdom, kim salia ban mih sha surok.
Haba kren mynta ka sngi, u Dr. Mukul u la ong ba ka jingjia ha Nepal, ka pyni ba ki samla kila kdang pdik ban shah ia ka rukom synshar kaba ki la sngew duh jingkyrmen bad kane ka la wanrah ka jingdom bad ka jingialeh pyrshah ia ki briew kiba don ha ka bor.
U nongialam ka liangpyrshah ula ong ba ha kane ka juk, kam long ban lehkai namar ba ka bor jong ka jingsam jingtip lyngba ki social media, ka khlain bad ka sted haduh katta katta ban pynpoi sha ki paidbah.
Haba iadei bad ka jylla Meghalaya, u la ong ba ka sorkar ka dei ban sngap ban shah shkor ia ki jingeh ki samla khamtam ban pynbeit ia ki jingdkoh ha ka rukom pyniaid ia ka eksamin rungkam. U la ong ba kumno u samla uba la pass ia ka B.Tech, M.Tech, engineer un iakhun ia ka kam jong ki district selection committee kiba rit bad ka long kumba pyniakhun phutbol ia u khynnah 10 snem bad uba 20 snem.
Ka jingbym pyllong ka sorkar ia ka eksamin thungkam, ka plie lad ban thungkam kontrak bad kane ka dei ka buit ban thung beain ia ki briew lajong kiba iajan bad kiba don ha ka bor. Kane kan pyndom pynbitar ia ki samla kiba trei shitom ban iakhun da ka mynsiem ba shida hynrei ki shah khang lad.
U la ong ba haba ki samla ki sngew duh jingkyrmen, kin sa khie bitar bad hadien kin sa mih wat ban ialeh pyrshah syndon kumba la jia ha Nepal.
Na ka jingbthei ka Nepal, hap husiar, ioh dom ki samla ia ka rukom synshar, ong u Dr. Mukul
