Shillong: Ka kynhun ki kali kamai ha Assam kila rai ban leh lang kumba leh ka kynhun ki kali kamai na Meghalaya, lada ki khang ia ki kali na Assam ban kit nongwankai sha Meghalaya.
Ka seng ki kali kamai ka All Khasi Meghalaya Tourist Taxi Association (AKMTTA) dang shen ka la rai ban khang ia ki kali kamai ba kit nongwankai na Assam, ban leit buh shaduh ki jaka jngohkai ha kylleng ki jaka ha Meghalaya.
U President ka Tourist Transporters’ Association of Assam (TTAA), u Kaushik Bhuyan u la ong mynta ka sngi ba ka seng ka la mynjur ia ka rai ka Motor Paribahan Sanmilita Sewakarmi Mancha, Assam, ban leh kumba leh ka seng ki kali kamai na Meghalaya.
U Kaushik Bhuyan ula ong ba ka seng kan ym shah ia ki kali kamai ban kamai sha Meghalaya bad kiba register na Meghalaya ban thep bad kit nongleit nongwan na Guwahati Railway Station lane na kad liengsuin LGBI Airport lada ka AKMTTA ka iaid shakhmat ban khang ia ki kali na Assam kumba ka la pynbna naduh ka 16 tarik mynta u bnai.
Katkum ka rai jong kane ka seng na Assam, wat ia ki kali kit ia ki mar mata, ki marbam mardih ruh kin pyrkhing bad lada jia shisha, ka jylla Meghalaya kan shah ktah jur khamtam lada khang ia ki kali kit marbam mardih.
U la ong ba kane ka jingkhang kan pynthylli syndon ia ka kam jngohkai ia ka Meghalaya, namar ba ki kalai kamai na Assam kim lah ban pdiang ia ka rai ki kali kamai na Meghalaya ban khang lad ia ki ban kit ia ki nongwankai sha Meghalaya.
U nongialam ka TTAA ula kyntu ia ka sorkar Meghalaya ban ym pyndem ha ka rai ka seng ki kali kamai ka Meghalaya, namar kan ktah kylla hi ia ka kam jngohkai ha ka jylla.
Ula pynrem ia ka jingkhim jingmut bad ia ka sienjam kaba bym shongnia kaba la leh da ka seng ki kali kamai na Meghalaya, namar ba ki kali kamai na Assam ki ioh permit ban kamai ha ki jylla Assam, Meghalaya, bad Arunachal Pradesh bad kiwei ki jylla ruh.
Haba kren mynta ka sngi, u myntri ka tnad jngohkai ka jylla u bah Paul Lyngdoh ula ong ba u la dep maham lypa ba ka sienjam kaba la pynbna ka AKMTTA kan ktah kylla ia ka jylla bad ula takrain ia kane ka seng kaba la shim ia ka rai khlem nongrim bad khlem thew tarajur bha kaba long kumba siat ialade hi.
Ka bniat namar ka bniat: Yn pynphai kylla sa ka Assam ia ki kali na Meghalaya, Nga la dep maham lypa: Paul
