Da I bah Snar S. Malngiang, Wahkhen
Mynhyndai la ong ba baroh ki jait jingthaw lai phew jait, ki maw ki dieng, ki sim ki doh ki mrad ki mreng, bad kiwei kiwei ki dang ia kren bad sngewthuh kawei ka ktien. Katkum ka khana puriskam jong ki riew tymmen, la ong ba, don ar tylli ki Mawbah ki Maw Ramsong kiba don hajan ka shnong Wahkhen jong ka thain Riwar Mihngi, ha ranap jong ki sharing lum ba shathie jong ki Ri Khasi, Uwei u dei u Maw Ryngkhang bad uwei pat u dei u Maw Pator. Kine baroh ar tylli ki Mawbah ki don ka jingiapmat ia kawei ka thei samla ba bhabriew bha jong kane ka thain. Ka jingbha beiw jongka ka, ka la pynlong ia kine artylli ki Mawbah ba kin ia mai ia nia bad iaknieh iaka. Kata ka jingiaknieh jongki ym don mano mano ba nud bad ba lah ban ia bishar bad pynbeit lem, namar baroh arngut ki dei ki syiem jong ki maw. Hapdeng kata ka jingiakajia, la mih ka jingtyrwa ba kin buh noh iaka sngi ka ia ba kin ialeh daka thma bad ia siat hapdeng jongki. Baroh ki khun ki ra-iot jong ka thain, ki la bna lut iaka tei ka jing thmu ban ialeh thma jong kita ki artylli ki maw, namar ki khlem pyndem satia uwei ia uwei pat. Ki la buh iaka sngi bad ka jaka kan long ha rud jong ka Wah Umnup, kawei na ki shnat ba heh tam jong ka Wah Rew.
Jan baroh ki bakhraw ba tri bad ki khun ki hajar, ki wan poi lut sha kata ka jaka ban sakhi iaka thma iaknieh tnga jong u Maw Ryngkhang bad u Maw Pator. U Maw Ryngkhang u wan na sha phang mihngi bad u hiar sha rud ka wah Umnup lyngba u lum Mawdngiang; Katba u Maw pator pat u wan na sha ka thain sepngi lyngba u lum Ksei. Uwei na ki riew khraw uba wan ban sakhi sha kane ka thma, na ka liang jong u Maw Ryngkhang u dei u Maw Babu, uba dei u patsha Rangbah jong u Mawryngkhang, u ieng ha syndah jongu. Don sa kiwei pat ki bakhraw batri kum u Maw Dngiang, u Maw Lyngker, u Maw Sohlah, u Maw Kir-kir, U Maw Ngap, u Maw Pen, u Maw Khlieng, u Maw Swet, u Maw Pongpa bad kiwei kiwei. Na ka liang jong u Maw pator pat, namar ba u wan kham slem ka por, don tang khyndiat eh ki nong sakhi. U Maw Lapong, u Maw Shyah bad u Maw Lamet, ki long tang maki ki ba wan synran ia u Maw Pator.
U Maw Ryngkhang uba bat iaka por, u la ieng ban ap lypa ia u Maw Pator, kynshreng la ka spong u ieng hajan kawei ka wah duid kaba kyrteng ka Wah Sìn, ka jaka kaba la iakut. Tang mar ia poi tiap, u Maw Pator, kham na shaneng jong ka jaka ba ki la iakut, u la tyrwa, “mano ban siat nyngkong?”, u la ong. U Maw Ryngkhang da ka sur kaba jem u la jubab, “Siat shwa maphi”, u la pynphai ktien. Tang mar kumta hi u Maw Pator u la siat ia u Maw Ryngkhang bad leit dei na ka tyrpeng jong u Maw Ryngkhang bad ka kdiah ka kti ka diang, hap ka tabla sha wah Umnup. Tang da ka kti ka mon, u Maw Ryngkhang u la pynphai kylla da kaba siat ia u Maw Pator bad dei na ryndang jongu, ngang-ly-ngang hap ka khlieh sha wah bad u la iap syndon hangta.
Mynta lah ban iohi sa tang ia ki dak pait pharia haka met jong u Maw Pator lada peit na sha shiliang ka wah. Katba u Maw Ryngkhang pat u don iaka main syiem main patsha, u dang iai ieng kynshreng haduh mynta. U la buh ia kata ka Thei Samla, kaba dei ka tnga jongu, hadien marsyndah eh jongu, kaba da itynnad shisha lada ngi peit na ka shnong Wahkhen. Lah ban iohi iaka dak jong ka jingkdiah noh jong ka tabla ka diang jongu Maw Ryngkhang ryngkat ka jainspong ha khlieh jongu.
Kane ka jaka ba ieng u Maw Ryngkhang ka jngai tang kumba 45 minit lada iaid da ka kjat na ka shnong Wahkhen. Ka leit jia ruh ba, ka jaka ba u Maw Ryngkhang u ieng, ka hap haka Raid Wahkhen jong hima Khyrim; katba ka jaka ba u Maw Pator u don, ka hap haka Hima Shangpieng, Khatar Shnong jong ka Hima Sohra. La pyniakhlad ia kine ki artylli ki jaka da ka Wah Umnup, Wah rew.