Shillong: Ka jingiatylli ki nongialam jong ki lai tylli ki ri ba khlain bor kynthup u Prime Minister ka India u Narendra Modi, u President ka Rusia u Vladamir Putin bad u President ka China u Xi Jinpin ka la pynktha khlieh ia u President ka America u Donald J Trump bad ki ri Europe.
Ha ka jingialang ka Shangai Cooperation Organisation dang shen ha nongbah Tianjin, China, la wan iashim bynta 25 tylli ki ri ha kaba kila iathir ban kyntiew ia ka khaïi pateng, ka ioh ka kot bad ka jingiadei hapdeng jongki bad ban ialeh pyrshah ia ki kam pyntriem.
Ka jingleit iashim bynta ka India khamtam ka jingleit khublei kti u Modi ia u Xi Jinpin ka China ryngkat u Putin ka Russia, ka la pynher syrngiew ia ki ri kiba don ha ka kynhun ba ialam ka America ne ka USA.
Ka India ka la phai khmat ban tei iaka jingiatrei bad ka China khamtam hadien ba u President ka America u Donald Trump ula pynkiew ia ka jingshim khajna ia ki mar bap hah na India haduh 50 percent kum ka jingpynshitom ia ka India namar ba ka thied umphniang na ka ri Russia kaba dang hiar thma ia ka Ukraine haduh mynta.
Kane ka jingleh u Trump ban pynshitom ia ka India da kaba oh khajna haduh 50 percent ia ki mar ban shalan sha America ka la pynbitar ia u Modi namar ba kan ktah ia ka khaïi pateng bad ka ioh ka kot ki briew ha India bad, u Modi ula thaw da kiwei ki lynti ban ialeh pyrshah ia kane ka jingleh u Trump. U Trump u la dawa ba ka India ka dei ban sangeh ban thied umphniang na Russia namar ba ka long kumba bei pisa ia ka ban thied bad shna ia ki tiar ialeh hynrei u Modi ula kyntait ia kane ka jingbuh kyndon u Trump namar ba ka India ka dei ka ri laidluid bad kam lah ban long niangkohnguh ha ka America.
Ka India ka la pyni nia ba balei ka America kam leh lang kumjuh ia kiwei ki ri kum ka China kaba thied kham bun ka umphniang na Russia ban ia ka India bad kumjuh ia ki ri Europe kiba dang bteng ban thied ia gas na Russia.
Ka USA bad ki ri Europe kiba khot kum ki Western Allies ha ka jingialam ka America kila syier mynta namar ba ka kynhun ka BRICS kaba don ka India, China, Russia, Brazil, South Africa bad kiwei ki ri, kiba khot kum ka Global South kila nang kiew bad nang khlain bad kim tieng shuh ban iapynbor ia ka America.
Ka la don ruh ka jingpynher khubor ba kine ki ri hapoh ka shatri ka BRICS kila thmu ban ym pyndonkam shuh da ka pisa Dollar ka America.
Kumba long mynta, ka thma ktien bad ka khaïi pateng hapdeng ka kynhun ki ri kiba don hapoh ka shatri ka BRICS bad ka kynhun ka G7 ka jur bha.
Ktha khlieh u Donald Trump ba iakhublei kti u Modi, Putin bad Xi
