Shillong: Ka jingtrei borbah ki pulit pyrshah ia ki nongtuh ar shaka, ka la wanrah ka jingjop thiaw, ki pulit ka East Khasi Hills bad ka West Jaintia Hills kila ioh kem 17 ngut ki snar nongtuh ar shaka na nongbah Shillong kiba die pat sha Bangladesh.
Hynnin ka miet 4 tarik Nailur, 2025, ha ka por 3:30 Am, katba ki pulit ka Mawryngkneng ki dang ap pahara ha surok, la wan kawei ka scooty na Shillong hynrei hadien ba ki iohi ia ki pulit, kila phai biang shaphang Shillong. Namar ka jingsuba jur ia ki, ki pulit kila pynap shrip noh na khlaw bad ha ka por 3:50am kane ka scooty ka la wan iaid biang hynrei mar syn iohi ia ki pulit, kila phet bak bad mar mar ki pulit kila kthong ia ki bad ioh bat syndon trait ia uwei uba kyrteng u Nehlang Lamare 24 snem na ka shnong Barato, West Jaintia katba uwei pat ula krad sha khlaw bad ieh ia ka Scooty ML05X5909 la ieh ha surok. Ki pulit kila rah ia une uba ioh bat sha thanat bad bad kila leit kthong sa ia uwei pat uba la lait phet bad hadien ka jingiakhura ia ki khlaw, ha ka por 5:15 am ki la ioh kem sa ia u Klement Timung 18 snem uba na Caraline Jowai.
Hadien ka jingtohkit, kila iathuh ba kila tuh ia kane ka scooty na Lapalang, Shillong.
Ha kane kajuh ka sngi, ki pulit kila leit kem sa ia ki 3 ngut kiba ju shimti ia ki ar shaka ba la tuh ban leit die sha ki briew na Bangladesh. Kine kiba shah kem ki dei u Peter Pohrmen 18 snem na Umdoh, Dawki, u Vicky Dkhar 20 snem na Bakur, u Romeo Ryngksai 24 snem na Bakur bad la kem ia ki na Nongtalang, West Jaintia Hills.
Kine ki dei kiba leit aiti ia ki ar shaka sha ki briew na Bangladesh.
Na ka jingiathuh jongki, ki pulit ka East Khasi bad West Jaintia Hills kila pyllong ia ka jingkhynra ha ka 4 bad 5 tarik bad kila ioh shuh shuh ia kiwei ba kynthup u Deimionjongmi Paslein 25 snem na Kseh, East Jaintia, Baristar Lamare 20 snem, uwei ba dang 15 snem bad u Lastborn Lamare 21 snem kiba dei na shnong Barato, West Jaintia Hills.
Hadien kane, kila ioh ban kem sa ia 9 ngut ki briew na Bangladesh kiba shu wan siew pisa bad shimti ki ar shaka ba la die tuh kiba kynthup u Kawsar Mia, 40 snem, Ali Hussain 40 snem, Md. Rafiq Miah 28 snem, Md. Jil Miah 30 snem, Monnan Miah 38 snem kiba dei na Sonamganj District, Bangladesh nangta u Md. Rumel Miah 20 snem, Md. Shabaj Miah 24 snem kiba dei na Sylhet District, nangta u , Ridial Hussain 19 snem na Tangan District, u Samiya Mia 25 snem na Hibiganj District Bangladesh bad uwei uba dang 17 snem.
Ia kine baroh la tian sha Kashari, la ong ka kyrwoh na u SP ka East Khasi Hills u bah Vivej Syiem.
Khrui ngat 19 ngut ki nongtuh ar shaka, 9 ngut ki Khasi, 10 ngut ki Bangladeshi ba ju tuh na Shillong
