Shillong: Ki pulit ka East Khasi Hills lyngba ka Special Investigation Team (SIT) kila aiti ia ka kaiphod ne chargesheet kaba 790 sla bad pynngat ha ki kyndon ain ia sa ngut ki briew.
Ia kane ka kaiphod ne chargesheet la aiti mynta ka sngi ha u Judicial Magistrate 1st Class ka Sohra Sub-Division.
Ki san ngut kiba la shah pynngat ha kane ka mukotduma ki long ka Sonam Raghuvanshi, u Raj Singh Kushwaha, Vishal Singh Chauhan, Aakash Singh Rajput bad u Aanand Kurmi.
Ha ka kyrwoh u SP ka East Khasi Hills u bah Vivek Syiem ula ong ba kan sa don shuh ka chargesheet kaban sa bynrap pyrshah sa ia ki lai ngut kiwei pat kiba la shah kynnoh donkti hadien ba la dep ia ka kaiphod ka Forensic.
Lah ban kdew ba u Raja Raghuvanshi ula shah pyniap dusmon ha ka tnga jong u ka Sonam Raghuvanshi ryngkat 3 ngut kiwei pat ha Parking ha Wei Sawdong ha u Jymmang mynta u snem. Hadien kane, ki pulit kila kem ruh ia ka Sonam Raghuvanshi, ia u Vishal Singh Chauhan, u Akash Singh Rajput bad ia u Anand Kurmi bad kham hadien kila kem ruh ia u Raj Singh Kushwaha uba dei u samla ka Sonam. Ia kine la kem na Indore, Madhya Pradesh.
Kham hadien kila kem ruh ia kiwei pat na Madhya Pradesh halor ka jingsuba donkti halor kane ka jingshah pyniap u Raja.
Ia ka SIT la khlieh da u SP City, bah Herbert Kharkongor ryngkat kiwei ki pulit ophisar bad ka la shim por saw bnai ia ki pulit ban pyndep ban aiti ia ka kaiphod chargesheet.
Aiti ki pulit ia ka chargesheet ba 790 sla ia 5 ngut halor ka jingiap u Raja
