Shillong: Ka Village Defence Primary Committee Nongstoin Area (VDPCNA) kala kyrpad kyrpon na u myntri ka tnad Social Welfare ka jylla u bah Paul Lyngdoh ban pynioh noh ia ka jaka buh ia ki nongdih drok ha Nongstoin, West Khasi Hills.
Ha ka sngi Palei, ka la aiti ia ka dorkhas ha u bah Paul ba un pyrkhat kyrpang ban buh noh ia ka jaka sumar ne rehab centre ia ki nongdih drok namar ba kumba long mynta haba ki ioh bat ia ki nongdih drok, ki hap ban leit buh biang sha ïing bad bunsien kane ka la wanrah ka jingktah ia ki bad ia ka ïing ka sem bad ka shnong.
Haba kren sha ki lad pathai khubor, u nongialam ki VDP u bah Mawkordor Syiemlieh ula ong ba ka Nongstoin ka dei kaba la jur bha ki nongdih drok mynta namar ba watla ki don kiba la kylla hynrei ki don pat kiba dang dih thymmai.
Kane ka kynhun ki VDP kala kyrpad ruh ia u myntri ban iarap ban ai ia ki jingdonkam ia ki VDP kum ka sopti uniform, ka bai rneng bad kiwei ki jingdonkam khnang ba kin nang lah ban shakri khambha na ka bynta ka jingbit jingbiang ki shnong ki thaw bad ka imlang sahlang.
Bym don jaka, hap leit buh sha ïing ia ki nongdih drok ha Nongstoin
