Shillong: Ka myntri ka sorkar jylla ka kong Ampareen Lyngdoh ka la pynpaw ia ka jingkmen bym lah shuh hadien ba ka kashari High Court Meghalaya ka la pynksan ia ka halor ka mukotduma tah sia lieh ha ka tnad pule puthi.
Haba kren sha ki lad pathai khubor mynta ka sngi ha ïing sah jongka, ka kong Ampareen ka la ong ba kane ka dei ka sngi kaba kmen ia ka bym lah shuh ban batai bad ka ai nguh ia u Blei uba la ai ia kane ka bynta ba kan leit sha ka kot ba kan pynkhuid ia ka sia ing kaba ki katto katne ki tah shi tah ha ka kyrteng jongka bad katno kila pynsngewsih bad kren kren bein ia ka.
Hynrei ka kloi ban mab ia kito kiba la leh bein bad kiba kren bein ia ka bad ka sngewnguh ia ka iing ka sem kaba don ha syndah jongka.
Ka la ong ba ka ïing ka sem ka la shah jynjar la 17 snem ban ioh ia ka jingbishar hok bad kan iai bteng ban ai ka jingshakri kaba khlem shah shiliang.
Ha kajuh ka por, ka la kam ba ka High Court Meghalaya ka la kyntait ban pynksan iaka ejahar kaba la ujor ka CBI pyrshah ia ka halor kane ka mukotduma.
Na ka liang ka nongiasaid ain jongka, ka la ong ba lada ka CBI ka dang leit ban iakhun sha Supreme Court kin iakhun beit halor kane ka mukotduma.
Lah ban kdew ba ka Meghalaya High Court ka la pynmih ia ka hukum mynshwa ba ka jingthungkam nonghikai LP skul ha ki skul sorkar ha ka jylla kaba la leh ha u snem 2009, ka dei kaba bakla bad ka bym shongnia haei haei ruh bad ka la pyndam ia baroh ka jingthung ia ki nonghikai baroh.
Ka High Court ka la pyndam ia ki nonghikai kiba shah thungkam katkum ka jingpynbna kaba la pynmih ha ka 10.12.2008, da u Deputy Inspector of Schools kynthup ha Shillong Sadar, Jowai, Amlarem, Tura bad Dadengre Centre.
Ka High Court ka la pyndam baroh kito ki kandidet kiba la shah thung ha ki san tylli ki jaka ialeh eksamin la ki dei kiba la thung pura ne shah thung shipor da ki politishian ne kiba shu pyndap sia lieh ruh kumjuh.
Ka High Court ka la bthah ruh ba ia ka jingtohkit baroh dei ban shimti da ka CBI ym shuh da ki pulit ka jylla bad dei ban pyndep ia ka jingtohkit hapoh hynriew bnai.
Lah ban kdew ba kumba 200 ngut ki nonghikai ki la shah thung kam beain ha ki skul LP ha ka jylla da kaba pyndam ia ki mark jongki da ka sialieh bad ia kine ki nonghikai la leh ha ka por ba long myntri ka Kong Ampareen Lyngdoh ha u snem 2009 lyngba ka jingphah jingthoh ki MLA bad ki myntri sorkar bapher bapher.
Ka CBI ka la pynmih kyrteng ia ka myntri tnad pule puthi ha katei ka por, ka Kong Ampareen Lyngdoh bad kiwei ba ki donkti ha kaban pyndam sia lieh ia ki mark jong ki kandidet ba pass ia ka eksamin ban pynpass pat ia kiba phiel.
Kane ka HLSC ka la bishar ia ki kot ki sla na ki san tylli ki jaka ialeh eksamin kynthup ha Tura, Dadenggre, Shillong, Jowai bad Amlarem. Katkum ka kaiphod, ki don 268 kiba thung ha ki san tylli ki centre bad 101 ngut kiba biang ne pass hok.
Ki kandidet kiba thung sialieh ha Tura ki long 23, Dadenggre 54, Shillong 60, Amlarem 38 bad ha Jowai 93 ngut. Ka HLSC ka la ong ba ki mark kiba ai ha ka interbiw ka long lymmuh lymmain khlem da bud ia ki kyndon ka sorkar katkum ka jingpynbna kaba pynmih ha ka 24 tarik Naiwieng, 2008.
Ngan pynkhuid ia ka sia ing kiba tah shi tah halor ka kyrteng jong nga: Ampareen
