Shillong: U nongialam ka liangpyrshah u Dr. Mukul Sangma ula maham ia ka sorkar jylla ba kam dei ban aiti ia ka Tura Medical College sha ki riew shimet hynrei ka dei ban long beit jong ka sorkar.
Haba kren sha ki lad pathai khubor mynta ka sngi, u Dr. Mukul ula ong ba ki riew shimet kila dep ai sngewbha haduh 100 akar ka jaka na ka bynta ban tei ia ka Tura Medical College bad kane ka pyni ba haduh katno ka la don ha ka dohnud jongki.
Lah ban kdew ba ka sorkar jylla ka la pynbna ba ka Shillong Medical College kan sdang klas noh naduh une u Nailur bad yn pdiang shwa 50 ngut ki samla pule doctor ha kane ka kynti.
Ha u snem 2012 ka sorkar kaba ialam ma u, ka la rai ban seng ia ka Tura Medical College ban pyniaid ka sorkar katba ia ka Shillong Medical College yn pyniaid ki kynhun shimet lyngba ka PPP mode ha kaba ka sorkar kan ai sngewbha tang ia ka jaka. Hynrei kane ka la iakynduh mawsiang na kiba bun ki daw.
Ha kaba iadei bad ka Shillong Medical College, u Dr. Mukul u la ong ba ka dei ka jingjop na ka bynta ka jingdonkam ka jylla bad ki paidbah hynrei ka sorkar ka dei ban pynthikna ba kan long kaba treikam pura bad kaba kynsai.
Tura Medical college ka dei ban long beit jong ka sorkar: Mukul
