Shillong: U nongialam ka liangpyrshah u Dr. Mukul Sangma ula kam ba ka jingrai ka sorkar ban siew tulop ia ki nongtrei jong baroh 3 tylli ki Autonomous District Council (ADC) ha ka jylla, ka long kumba kwah ban plie ia ka Pandora Box ne ka Synduk ka Pandora.
Haba kren mynta ka sngi, u Dr. Mukul ula ong ba ka rai ka sorkar jylla ka long ka jingpynkhein ia ka riti synshar ka ri namar ba ki District Council ki dei kiba laitluid katkum ka bor ba la pynkup bor ka riti synshar ka ri.
U la ong ba u kwah ban sngewthuh hato ka sorkar ka mut ban siew tulop da kaba kynthup baroh katkum ki jingdonkam ba ka la leh ia ki nongtrei sorkar ne ka shu mut ban ai da ka Grant sha ki District Council ban siew tulop.
Ula ong mynshwa ruh ka sorkar jylla ka la knieh ia ki LP skul na ki District Council.
Lah ban kdew ba dang shen ka sorkar jylla ka la rai ban tyrwa sbun mynsiem sha baroh ki district council ha ka jylla ba kan siew lem ia ka tulop jong baroh ki nongtrei jongki hynrei ka shong pat ha ka mon laitluid jongki ban jied lada ki treh ne em, bad ka sorkar kan ym pynbor bad kan ym tuklar ia ki kam jongki. Hynrei kiba bun ki sngew ba kane ka dei ka jingriam ka sorkar ban knieh pat ia ka bor jongki hadien.
Kwah plie ka sorkar ia ka Pandora Box ban tyrwa siew tulop ia ki ADC, ong u Dr. Mukul
