Shillong: Ka Hima Dwar Nongtyrnem ka don shibun ka spah kaba la ai kyrpang ka mariang naduh ka rep ka riang, ki lum ki riat, ki khlaw ki btap haduh ka khana hyndai ba bun rukom.
Ha ka jingleit jngoh ia kawei ka shnong kaba khot ka Nongrim Warding hapoh ka Hima Dwar Nongtyrnem hap ban iaid kjat shiteng kynta eiei na shnong Thyllaw namar ba kam pat don surok bad ka jngai kumba 24 km na Mawsynram.
Ka shnong ka don sha them ha kaba la ker sawdong da ki lum bad ki riat bad ha ka por lyiur, la pyniap biej da ki kshaid kiba noh rymphai ryngkat ka sur sawa bad ki wah kiba kyrhuh sawdong ka shnong.
Ha syndah kane ka shnong kumba katto katne minit, la don u maw thep khlieh shipai, ha kaba la iathuh ba ki briew mynshwa kila bret ia ki khlieh ki shipai phareng kiba wan hiar thma ia katei ka jaka.
La iathuh ba mynshwa, ki briew ka Nongrim Warding haba ki tip ba ki shipai phareng kin wan hiar thma ia ka shnong, kila shet da ka kyiad da uwei u phan lyngkhui uba long bih bad ynda ka la ih ka la biang, baroh ki ia leit rieh noh bad ieh kumto ia ka kyiad hapoh ka ïing bad ki shipai phareng mar synrung ha ïing, tang shu iohi bad sma iwbih ka kyiad kila kynrup pynsted wut wut ban iadih hynrei kim tip ba ka dei ka kyiad bih. Tang shiphang kila buaid bad thiah lyngktar bad iap syndon namar ba u phan lyngkhui uba ju khot ha katei ka shnong, u don ka bih kaba khlain bha bad hadien kila iap, ki ia mih na jaka rieh bad khrai ia ki khlieh ki shipai phareng bad thep haduh 9 tylli ka khoh shiang kaba heh bha bad leit bret ha katei ka krem kaba don ha wah Weiswai.
Ha kane ka wah weiswai, ha syndah kane ka krem bret khlieh, ka don sa kawei ka khana kaba naduh hyndai, ha kaba ki tymmen ki la ai kyrteng lai tylli ki pung, kawei ka dei ka pung shynrang kaban sum ki shynrang, kawei ka pung kynthei ban sum ki kynthei bad kawei pat ka pung khynnah kaban sum ki khynnah.
Ym tang katta, hajan kine ki pung, la don sa uwei u mar uba khampher, uba ki briew kane ka shnong ki khot kum u maw dak khlieh, ha kaba la iathuh ba katkum ka khana hyndai, la kit ia une u maw bah da u briew ha khlieh bad la sah ka dak pyllung kaba them kaba la pynshong da ka khlieh halor jongu bad na kane ka daw, ki khot maw dak khlieh.
U bah Phoslanjune Kariang ula iathuh ba ka Hima ka don ruh ka kynroh kat kynroh Jerusalem kaba la tei mynshwa ban khang lad ia ki shipai phareng bad ban hiar thma ruh ia ki bad kane ka kynroh ka don kham jngai na shnong ha ka jaka kaba khot ka lad lynti sha Thyllaw bad Nongrim Warding.
Ka kynroh kum ha Jerusalem ka don ha Hima Hima Dwar Nongtyrnem
