Shillong: Ki kmie ki kpa kila jaw ummat, sah ha ka jingkhuslai lynga pisa ban pyrkhat ia ka lawei jong ki khun jongki hadien ba ka skul ka la shu khang sah la lai bnai kynthih na ka daw bym don nonghikai.
Kane ka la jia ha ka shnong Nongrim Warding ha kaba ka Govt. LP School ha kane ka shnong kaba hap ha Mawsynram C&RD Block, ka la shah ieh beiñ khlem nonghikai hadien ba la khlad noh u nonghikai ha kaba ki khynnah skul ki la duh ïa ki jingpule jong ki.
Ha ka jingshisha, ka bor shnong bad ka Managing Committee kila leit tynruh bunsien sha ka sorkar ba kan wanrah nonghikai noh ne ban thaw lad da kumwei pat khnang ban wanrah nonghikai ban lait ki khynnah skul na ka jingduh, hynrei wat hadien lai bnai ruh jlam jlam khlem leh eiei ka bor sorkar.
Ban poi sha ka Shnong Nongrim Warding hap ban shu ïaid da ka kjat ban hiar ïa u thiep na ka shnong Thyllaw kumba 1 kynta ban poi sha katei ka shnong namar bym patn don surok.
Ha ka jinghiar sha katei ka shnong, la ioh ban iakynduh ia ki nongkitkam shnong bad kumjuh jong ka Managing Committee kiba la pynpaw ia ka jingsngewsih kthang halor kane ka jingjia haduh ba ka skul ka hap ban shu khang tala namar bym don nonghikai.
Ki la kyrpad ïa ka sorkar ba kan peit lem ruh ïa ka jinglong jingman jong ka skul na ka jingsator jong ki païa kaba buh jingma ïa ki khynnah skul.
U Rangbah Shnong Bah Kerlang Sohtun uba dei ruh u President jong ka Managing Committee jong katei ka skul u la pynpaw ka jingsngewsih bad sngewdiaw ba mynta la lai bnai pura ka sorkar kam pat shym la thung nonghikai ha katei ka skul. U la ïathuh ba ha u snem 2023 ka sorkar ka la thung 2 ngut ki nonghikai, hynrei kawei ka nonghikai ka la resign noh bad sah satang uwei hynrei sngewsih ba u la khlad noh, ha kaba ka skul haduh mynta ka sah thylli khlem ki nonghikai.
Ka por jong ki khynnah skul ka la shu sepei bad ki la duh noh ïa ka eksam half yearly hadien ba u nonghikai u la khlad noh. Kumta ka Managing Committee ka kyrpad ïa ka sorkar ba kan leh noh kham kloi ban thung ïa ki nonghikai khnang ba ka skul kan ïoh ban bteng biang ïa u snem ba dang sah.
Ia kane ka skul seng da ka Presbytery Shella, kaba la shimti pat sa ka District Council kaba la tip kum ka DCLP School bad ha u snem 1993 ka sorkar ka la shimti hi noh na ka District Council ïa ki skul LP bad kane ka skul ha Nongrim Warding ruh ka hap hapoh ka jingpeit jingkhmih jong ka Sorkar