Shillong: Ha ka sngi Saitjain ka 30 tarik Nailar 2025, ka shnong Umroi Nongrah kala mih paidbah ban kiew sha ki lum ki riat, ki khlaw ki btap ban wad ia u para shnong u samla Pynskhemlang Kharkhrang 25 snem.
Ka jingwad ka la sdang naduh ka por 10 baje mynstep haduh janmiet ha kylleng sawdong ki jaka kum ka thain Mawlai, Mawlyndep, Umiam, Umbir, bad bun kiwei ki jaka.
Da ki phew kali ki para shnong kila iamih paidbah da ka mon sngewbha ban leit wad ia une u para shnong uba dang jah haduh mynta.
U samla Pynskhemlang ula jah naduh ka 26 tarik Naitung ba la dep bad la iathuh ba ula ngam ha pung Umiam hynrei haduh mynta khlem pat lap satia ia ka met jongu watla ki bor sorkar kila wad hapoh ka pung la shi taiew eiei.
Na ka liang u rangbah shnong ka Umroi Nongrah u bah Prestingroy Dkhar ula iathuh ba ka shnong ka sngewsih kthang halor kane ka jingjah u samla ka shnong bad da ka jingsngew khia kala rai ban iarap ia kiba haïing ban leit shnong bad ki nongshong shnong kila iamih paidbah da ka mon sngewbha khlem kano kano ka jingsiew ne ka bainong.
Ula ong ba u sngewnguh ia kito baroh naduh kiba sei ia ki kali ban kit ia ki briew khlem kano kano ka jingkhmih lynti ia ka jingioh nong hynrei da ka mon sngewbha.
Ha kajuh ka por, u rangbah shnong ula ong ba ka shnong kan iai don ha syndah kiba haiing lada ki donkam sha ka bor sorkar ne wad ban leit wad biang ia une u samla uba khlem pat lap satia.
Ha kajuh ka por, u rangbah shnong ula ong ba kampher lada long ha kano kano ka dur ruh lada dei ba ioh tang ka frame ruh khnang ban ai ka jingsuk ia kiba haiing bad ka shnong. Hynrei kumba long kumta, ka shnong kam sngew lah shuh ban ong kumno kumno ruh bad kaba sah ka long sa tang ka bor u Blei namar ka bor u briew te la sngew kutlad.
Lada ioh tang ka ‘Frame’ ruh ym lei lei, sa tang ka bor u Blei, ka bor u briew te ym lah batai shuh
