Shillong: Ki dkhot ka seng longkmie Wahthapbru, kim banse ban hap mih sha surok hapdeng miet ruh ha Mophran, na ka bynta ban khang lad ia ki jingsniew.
Ka Motphran ka dei ka iew paidbah myn sngi hynrei tang shu la miet, ka la kylla ktem nongdie bad nongdih drok.
Dang hynnin ka sngi, kila ioh bat shi kynhun ki nongdih bad nongdie drok bad mynta ka janmiet ruh kila ioh bat kumba 5 ngut ki khynnah samla kiba iadih bad die drok.
Ka President ka seng longkmie Wahthapbru ka kong Suki Pariat ka la ong ba ka jingailad ban shong die jingdie por mynmiet ka la ailad ia ki riew sniew ban pyllong ia ka Motphran kum ka ktem ki kam sniew bad dei na kane ka daw, ba kila iamih paidbah ban mih ban ap surok mynmiet ban beh krad noh ia ka jingsniew.
Ka dorbar shnong ka la buh por ba ym shah shuh ban die jingdie 10:30 pm ha Motphran.
Ka la ong ba ki khynnah kiba dang 19-20 snem kila ngam jyllop ha u drok bad lada ka dang iai bteng kumne, ki samla ka jaitbynriew kin sa jot thiaw. Kaba kham pang met, ka long ba ki don ruh ki khynnah samla kynthei kiba ngop ha u drok bad haba kylli balei ki jied ia kane ka lynti, ki ai jubab ba la phet u lok bym lah bsa ia ki khun bad don kiba ong ba ki leh katba mon namar ba ka dei ka jingim jongki.
Ka seng longkmie ka la phah khyrdep noh ia ki dukan ba kim dei ban plie shuh da la miet khnang ba ki briew kin ym byrngia ban shong thadlad ha katei ka jaka. Ka la ong ba ki nongshong dukan madan, kim dei shuh ban ker da plastic, shna ïing dara namar ba ki kylla shong aram ki nongdih drok ynda la miet.
Ka la ong ba ka donkam ban don ki pulit pahara kaba biang ha ka thain Motphran khnang ban shynrain ki nongleh kam sniew bad kawei ka donkam ruh ban biang ki street light ha sawdong katei ka thain.
Mih ki longkmie Wahthapbru ban ap miet: Myn sngi ka iew paidbah, da miet kylla ktem drok ka Motphran
