Shillong: U nongaiktien ka sorkar jylla u bah Paul Lyngdoh ula pynksan ba ka jingtyrwa ka sorkar jylla ban siew tulop ia ki nongtrei ki lai tylli ki Autonomous District Council (ADC) kynthup ka KHADC, JHADC bad ka GHADC kam dei ba ka thmu ban shimti noh hynrei ka dei tang ka jingkyrshan ioh ba kin khyllem pynban ha kano kano ka por na ka jinghiran pisa.
Myn shi sngi, ka cabinet ka la mynjur ban siew tulop noh ka sorkar ia ki nongtrei jong kine ki district council hynrei ka shong pat ha ka jingpdiang jongki, lada ki treh ne em bad ka sorkar kan ym pynbor.
Haba kren sha ki lad pathai khubor, u bah Paul ula ong ba dei ban sngewthuh ia ka jingmut kaba shu iarap da ka mon sngewbha bad ka jingiarap kaba teh da ka ain. U la ong ba ar tylli ki District Council ki lah ban khyllem ha kine ki khyndiat snem ban wan namar ka jinghiran pisa bad lada ka sorkar kam ai jingkyrshan, kan long ka jingma ia ki namar ba ka sorkar kam lah ban shu long ka nongpeitkai namar lada jia ba ki khyllem, kin kylli kylla ka leh aiu ka sorkar.
Lada khyllem ki District Council, kin kylli ka leh aiu Ka sorkar?: Paul
