Shillong: U myntri ka tnad jngohkai ka jylla u bah Paul Lyngdoh ula ong baroh shi katta ym ju ioh sngew ban don ka jingdawa na ka seng kali kamai namar ba kam pat kiew ka kam jngohkai pyrthei ha kane ka jylla hynrei mynta hadien ba kane ka kam ka la kiew, ki briew ki kwah ban rep na kane ka kam hynrei kam don eiei kaba bakla ia kata.
Hynrei ha kajuh ka por, ula maham ba ka jingdawa jong ka seng ki kali kamai ban khang ia ki kali nabar jylla ka lah ban wanrah ka jingktah kylla ia ki jylla hi.
Haba kren mynta ka sngi ka 28 tarik Nailar 2025, u bah Paul ula ong ba kaei kaban jia lada ka sorkar Assam ruh kan khang ia ki kali kamai na Meghalaya ban leit buh briew bad kane kan wanrah ka jingktah kaba shyrkhei bha.
U la ong ba ka jylla Meghalaya kam don ka kad liengsuin kaba heh, kam don ka steshon rel, ki jaka sumar ha kaba ki briew na kane ka jylla da ki hajar man ka sngi, ki hap ban leit sha Assam ban leit shabar bad ban pyndep ia ki kam ki jam.
Ula buh jingkylli, hato ka seng kali kamai kan shim jingkitkhlieh lada ka poi sha une u pud. Ula ong ba kim dei ban pyrkhat khim jingmut tang na ka bynta ka jingmyntoi shimet.
U Myntri ula ong ba ka sorkar ka la don ka Committee kaba khlieh da u Commissioner & Secretary bah C.V. Diengdoh ban pynbeit ia ki jingeh jong ki kali kamai bad ula kyntu ia ki ba kin buddien ban weng ia ki jingeh jongki ha jaka ban wanrah pynban ia ka jingshit kaban ialam sha kaba sniew.
Baroh shi katta ym ju ioh sngew ia ki jingdawa na ki kali kamai namar ym pat kiew ka kam jngohkai: Paul
